'مسلمان مسجد کی زمین ہدیہ نہیں کر سکتا'

ایودھیا اراضی معاملہ پر عدالت سے باہر مصالحت کرنے اور مندر کے لیے زمین ہدیہ کرنے کے مشوروں کو خارج کرتے ہوۓ آل انڈیا مسلم پرسنل لاء بورڈ کے سکریٹری کمال فاروقی نے کہا کہ 'اس طرح کی باتیں پہلے بھی سامنے آ چکی ہیں لیکن مسلمانوں کی پوزیشن نہیں ہے کہ وہ زمین ہدیہ کر سکیں۔'

انہوں نے ای ٹی وی بھارت سے بات کرتے ہوئے کہا کہ 'ہدیہ کی اہلیت اس وقت ہوگی جب ہم زمین کے مالک ہونگے لیکن جب ہم مسجد کے مالک نہیں تو کیسے ہدیہ کر سکتے ہیں۔'

کمال فاروقی نے مزید کہا کہ 'ابھی پریشان ہونے کی ضرورت نہیں، مقدمہ اپنے آخری مراحل میں ہیں، ایک بار عدالت کا فیصلہ آنے دیں، اس کے بعد بھی بات ہو سکتی ہے۔'

انہوں نے کہا کہ 'ہندوستان کے عوام راجیو دھون کے شکر گزار رہیں گے کہ انہوں نے اپنی پروفیشی اینسی کا اچھا استعمال کیا ہے۔'

انہوں نے کہا کہ 'دوسرے فریق عدالت میں اپنی بات اچھے سے نہیں رکھ سکے جبکہ مسلم فریق نے اپنی بات اچھے طریقے سے رکھی ہے۔'

انہوں نے کہا کہ 'جہاں تک نتائج کا معاملہ ہے وہ الّلہ کے ہاتھ میں ہے۔'

انہوں نے کہا کہ 'وہ سپریم کورٹ کا احترام کرتے ہیں اور اس کا فیصلہ مانیں گے لیکن دوسرا فریق یہ نہیں کہ رہا ہے کہ وہ سپریم کورٹ کا فیصلہ مانیں گا۔'