شاہی مسجد فتح پوری کے امام مولانا ڈاکٹر مفتی محمد مکرم احمد نے آج جمعہ کی نماز سے قبل خطاب میں کہا کہ حضور اکرم صلی اللہ علیہ وسلم کی توہین آمیز خاکوں کی اشاعت کی حمایت میں صدر فرانس میکخواں کا بیان ناقابل قبول ہے، کوئی بھی سنجیدہ اور مہذب سماج میں رہنے والا اس کی حمایت نہیں کرسکتا۔
فرانسسی صدر کا بیان عالمی طور پر بدامنی اور اشتعال پھیلانے کا سبب بن سکتا ہے ان سے ہمارا مطالبہ ہے کہ وہ اپنے بیان کو واپس لیں اور فرانس میں پیغمبر اسلام کی توہین آمیز خاکے بنانے والوں کے خلاف کاروائی کریں اور اظہار رائے کی آزادی کا قانون بناتے وقت مذہبی شخصیات کا احترام ملحوظ رکھیں۔
مفتی مکرم نے اقوام متحدہ و سلامتی کونسل سے اپیل کی کہ فرانس کے مسلمانوں کی جان و مال کی حفاظت کو یقینی بنایا جائے، مقررین نے کہا کہ اسکول کے ٹیچر کے قتل کو کوئی بھی درست نہیں ٹھہراتا اس مذموم فعل کا سدباب ہونا چاہیے۔ انہوں نے بھارت سے اپیل کی کہ صدر میکخواں کے بیان کی حمایت نہ کی جائے تو بہتر ہے۔
مفتی مکرم نے مسلم ممالک سے پر زور اپیل کی کہ معاشی اور سیاسی تمام اصولوں پر عمل کرتے ہوئے عالمی عدالت میں اور اقوام متحدہ و سلامتی کونسل میں اس مسئلہ کو پیش کیا جائے۔
انہوں نے عرب اور غیر عرب تمام مسلم ممالک سے پر زور اپیل کی کہ کلی طور پر فرانس کی مصنوعات کا بائیکاٹ کیا جائے اور اس بات کو یقینی بنایا جائے فرانس کی بنی ہوئی کوئی چیز بھی مسلمان استعمال نہ کرے جب تک کہ فرانس کے صدر اپنے بیان کو واپس نہ لیں۔
