قومی دارالحکومت دہلی کے صفائی ملازمین گذشتہ کئی ماہ سے تنخواہ ملنے کے انتظار میں ہیں لیکن نہ تو ایم سی ڈی کے پاس تنخواہ دینے کے لیے فنڈ ہے اور نہ ہی دہلی حکومت کے پاس پیسہ، ایسے میں صفائی ملازمین کی تنخواہ پر سیاسی چہ مہ گوئیاں زوروں پر ہیں۔
ملک گیر سطح پر نافذ لاک ڈاؤن کے سبب ریاستی حکومت خسارے سے گزر رہی ہے اور مرکز سے مدد کی درخواست بھی کر چکی ہے۔
ملازمین کی تنخواہ تو دور مالی خسارے کے سبب دہلی حکومت اپنے اخراجات ہی پورے نہیں کر پا رہی ہے تو ایم سی ڈی کی مدد کس طرح سے کر سکتی ہے۔
ای ٹی وی بھارت کے نمائندے نے کانگریس اور عام آدمی پارٹی کے کونسلرز سے صفائی ملازمین کی تنخواہوں سے متعلق گفتگو کی۔
تنخواہ پر بات کرنے کے بجائے دونوں رہنما ایک دوسرے کو اس کا ذمہ دار ٹہھرانے لگ گئے حالانکہ عام آدمی پارٹی کے کونسلر محمد صادق نے بتایا کہ دہلی حکومت ملازمین کی تنخواہوں کے لیے پیسہ دیتی رہتی ہے لیکن ایم سی ڈی اس پیسے کا استعمال دیگر کام میں کر لیتی ہے جس کے سبب یہ پریشانیاں پیش آئی ہیں۔
وہیں کانگریس پارٹی کے کونسلر راکیش کمار نے بتا یا کہ ' کیجریوال حکومت ایم سی ڈی ملازمین کے واجبات کی ادا ئیگی میں ہمیشہ ٹال مٹول کرتی آئی ہے جس کے سبب صفائی ملازمین کو دشواریاں پیش آتی ہیں۔
