دارالحکومت دہلی کے جنگ پورہ علاقے سے ایک حیران کن معاملہ سامنے آیا ہے۔ جہاں گھر کے باہر کھڑی بہت سی مہنگی کاروں کے پہیے چوروں نے چوری کرلئے جبکہ تمام گاڑیاں محفوظ ہیں۔
دہلی میں پارکنگ کا مسئلہ کسی سے پوشیدہ نہیں ہے۔ دہلی میں پارکنگ کی تعداد جو ہونی چاہیے اس کے مقابلے آدھے سے بھی کم پارکنگ اسپاٹ دستیاب ہیں۔ ایسی صورتحال میں لوگ اپنے گھر کے باہر کار کھڑا کردیتے ہیں۔
دہلی کے جنگ پورہ علاقے کے بہت سارے رہائشیوں نے اپنی گاڑیاں گھر کے باہر کھڑی کردی تھیں، لیکن اگلی صبح جب بیدار ہوئے تو یہ نظارہ حیران کن تھا۔ متعدد گاڑیوں کے پہیے چوری ہوگئے تھے اور تمام گاڑیاں اینٹ کے سہارے کھڑی کردی گئی تھیں۔ کار مالکان کا کہنا ہے کہ انہوں نے زندگی میں پہلی بار دیکھا ہے کہ چور گاڑیوں کے بدلے پہیے چوری کررہے ہیں۔
غور طلب ہے کہ دہلی میں یہ پہلا واقعہ نہیں جب گاڑی کے پہیے چوری ہوگئے ہوں۔ اس سے قبل بھی دہلی سے ایسے بہت سے معاملات سامنے آئے ہیں جہاں کار محفوظ ہے لیکن اس کے پہیے چوری ہوگئے تھے۔
پولیس عہدیداروں نے دبی زبان میں کہا ہے کہ دہلی میں کچھ گروہ سرگرم ہیں جو گاڑیاں نہیں چوری کرتے بلکہ پہیے چوری کرتے ہیں اور پھر انہیں کباڑ میں فروخت کرتے ہیں۔
