دہلی: مسلم اکثریتی علاقوں میں ترقیاتی کاموں کا فقدان

دہلی کے مسلم اکثریتی علاقوں میں ترقیاتی کاموں کا فقدان دیکھنے کو ملتا رہا ہے۔ ان علاقوں میں گندگی کا انبار لگا رہتا ہے۔ بیشتر مسلم علاقوں میں پینے کا صاف پانی بھی دستیاب نہیں ہے، سڑکیں ٹوٹی ہیں، گندے پانی کی نکاسی کے لیے کوئی صحیح انتظام نہیں ہے۔ عوام کو لاحق ان تمام پریشانیوں کے باوجود مقامی ایم ایل اے ان مشکلات کو دور کرنے کے بجائے خاموش ہیں۔

دارالحکومت دہلی میں مسلم اکثریتی علاقوں میں ترقیاتی کاموں کا فقدان دیکھنے کو ملتا رہا ہے۔ موجودہ صورتحال میں کیجریوال حکومت یہ دعوی کرتی رہی ہے کہ جب سے وہ اقتدار میں آئی ہے تب سے دہلی میں ترقیاتی کاموں میں اضافہ ہوا ہے لیکن مسلم علاقوں میں تصویر مختلف ہے۔ یہاں ترقیاتی منصوبے تو دور بنیادی سہولیات بھی میسر نہیں ہیں۔

ای ٹی وی بھارت کے نمائندہ نے دہلی کے مختلف مسلم اکثریتی علاقوں کا دورہ کیا۔ ایسے اکثر علاقوں حالات ایک جیسے ہیں۔ اس دوران باڑا ہندو راؤ کے ایک بزرگ شخص نے بتایا کہ شکایت کرتے کرتے پریشان ہو چکے ہیں، لیکن علاقہ میں کام کرانے کوئی نہیں آیا۔ انہوں نے مزید کہا کہ' سڑکوں پر اتنے گڈھے ہیں کہ چلنا دشوار ہے اور سیویج کا پانی جب سڑکوں پر آتا ہے تو پریشانی میں مزید اضافہ ہو جاتا ہے۔ مقامی شخص محمد حبیب نے بتایا کہ' متعدد بار مقامی رکن اسمبلی سے اس کی شکایت کی جا چکی ہے لیکن آج 6 برس گزرنے کے بعد بھی ہماری پریشانیوں کا کوئی حل نہیں ہوا ہے۔

اندرلوک کی رہنے والی صالحہ فرحت نے بتایا کہ 'علاقہ میں گندگی کا انبار لگا رہتا ہے۔ پینے کا صاف پانی بھی دستیاب نہیں ہے۔ سڑکیں ٹوٹی ہوئی ہیں، کوئی خبر لینے والا نہیں ہے۔ مقامی ایم ایل اے سے بھی کئی دفعہ شکایت کی گئی اس کے باوجود انہوں نے کوئی قدم نہیں اٹھایا۔