دارالحکومت دہلی کی شاہجہانی جامع مسجد کے شاہی امام سید احمد بخاری نے کورونا وائرس کے دن بدن بڑھتے معاملے کو لے کر تشویش کا اظہار کیا گیا۔
ان کا کہنا ہے کہ جس طرح سے کورونا وائرس متاثرین کی تعداد میں مسلسل اضافہ ہو رہا ہے اس سے وہ کافی پریشان ہیں۔ اس پریشانی کے پیش نظر انہوں نے مسلمانوں سے اپیل کی ہے کہ پنجگانہ نمازیں اپنے گھروں میں ہی ادا کریں۔
انہوں نے کہا کہ جب شریعت ہمیں اس بات کی اجازت دیتی ہے اور ہمارے پاس عذر بھی موجود ہے تو اپنی جانوں کی حفاظت کرنا ہمارا فرض ہے۔ اس لیے ہمیں چاہیے کہ پنجگانہ نمازیں اپنے گھر میں قائم کریں۔
انہوں نے مزید کہا کہ' اللہ کا شکر ہے کہ دہلی میں مساجد کے دروازے کھول دیے گئے ہیں لیکن حالات کو دیکھتے ہوئے میں غور و فکر کر رہا ہوں کہ جامع مسجد کو پھر سے بند کیا جائے، یا نہیں؟
غور طلب ہے کہ دہلی کے نائب وزیر اعلی منیش سسودیا کی جانب سے گزشتہ روز یہ بیان جاری کیا گیا تھا کہ اگر حالات ایسے ہی رہے تو 31 جولائی تک ساڑھے پانچ لاکھ کرونا کے معاملے سامنے آ سکتے ہیں جس کے بعد سے ہی شاہی امام سید احمد بخاری غور و فکر میں مشغول ہیں۔
