دہلی گورنمنٹ ٹیچر ایسوسی ایشن نے سرکاری اسکولوں کو مکمل بند کرنے کا مطالبہ کیا ہے۔ ایسوسی ایشن کے جنرل سیکرٹری اجے ویر سنگھ یادو نے وزیر تعلیم کو لکھے خط میں کہا کہ 'کورونا انفیکشن کی بے قابو رفتار کے باعث دہلی ملک میں دوسرے نمبر پر ہے۔'
اس تشویشناک صورتحال کے باعث دہلی کے سرکاری اسکولوں میں اساتذہ کی ایک بڑی تعداد انفیکشن کا شکار ہو رہی ہے۔ ایسے میں یہ لازمی ہو گیا ہے کہ اسکولوں کو بند کردیا جائے۔
واضح رہے کہ دہلی حکومت کے ماتحت محکمہ تعلیم میں دوسرے محکموں کے ملازمین کے مقابلے میں سب سے زیادہ تعداد میں اساتذہ ہی ملازمت کرتے ہیں اور وہ پچھلے سال سے فرنٹ لائن ورکر کی حیثیت سے دہلی میں کورونا واریئرز کی حیثیت سے خدمات انجام دے رہے ہیں۔
جنرل سیکرٹری اجے ویر سنگھ یادونے کہا کہ انٹر کلاس کو چھوڑ کر تمام کلاس کے امتحانات منسوخ ہونے کے بعد اسکولوں میں اساتذہ کی ذاتی حاضری کی ضرورت نہیں ہے، کیونکہ کورونا کی وبا خطرناک صورتحال میں ہے اور اساتذہ تیزی سے انفیکشن کا شکار ہو رہے ہیں۔ نصف سے زیادہ اساتذہ ابھی بھی کرونا ڈیوٹی میں ہیں۔ ایسی صورتحال میں کچھ عرصہ کے لئے اسکولوں کی مکمل بند کرنا ہی مناسب ہوگا۔
