کورونا وائرس کی دوسری لہر کافی تیزی سے ملک میں پھیل رہی ہے جس کی وجہ سے 24 گھنٹوں میں دو لاکھ سے زائد نئے کیسز درج کیے جارہے ہیں، موجودہ صورتحال گذشتہ برس کے مقابلے زیادہ خطرناک ثابت ہورہی ہے۔
کورونا وائرس کی دوسری لہر کو روکنے کے لیے مرکزی و ریاستی حکومتیں جو بھی اقدامات کررہی ہیں وہ ناکافی ثابت ہورہے ہیں۔ وہیں دہلی کے وزیراعلیٰ اروند کیجریوال نے دہلی میں مکمل لاک ڈاؤن کے بجائے ویکینڈ کرفیو نافذ کر کے کورونا کے انفیکشن پر قابو کرنے کی کوشش کی ہے۔
دہلی میں کل 25 ہزار سے زائد افراد کورونا پازیٹیو پائے گئے تھے جبکہ اس سے ایک روز قبل یہ تعداد 24 ہزار تھی، کورونا وائرس کے قہر کو دیکھتے ہوئے دہلی کے عوام بھی حکومت کے اس فیصلے کا احترام کرتے ہوئے ویکینڈ کرفیو پر اپنے گھروں میں ہی رہے۔
ویکینڈ کرفیو پر ای ٹی وی بھارت کے نمائندے نے دہلی کی مختلف شاہراہوں کا جائزہ لیا اور جہاں عام دنوں میں گاڑیوں کی لمبی قطاریں ہوتی تھیں وہاں پر ویکینڈ کرفیو کے سبب شاہراہیں بالکل سنسان رہیں۔
قابل ذکر ہے کہ دہلی حکومت کی جانب سے 30 اپریل تک رات 10 بجے سے صبح 5 بجے تک کورونا کرفیو نافذ کیا گیا ہے، اس کے علاوہ ہفتہ اور اتوار کے روز مکمل لاک ڈاؤن نافذ کیے جانے کا بھی حکم دیا گیا ہے۔
