پیرکو دہلی میں مرکزی وزیر داخلہ امیت شاہ کے ساتھ کورونا کی بے قابو صورتحال پر کل جماعتی اجلاس ہوا جس میں تمام رہنماؤں نے دارالحکومت میں کورونا کی روک تھام کے لئے مل کر کام کرنے پر اتفاق کیا۔
ساؤتھ بلاک میں تقریباً ڈیڑھ گھنٹے تک جاری رہنے والی میٹنگ کے بعد باہر آئے دہلی بی جے پی کے صدر آدیش گپتا نے کہا کہ اجلاس میں شامل تمام رہنما دہلی کو کورونا وبا سے نمٹنے کے لئے مل کر کام کرنے پر متفق ہیں۔
انہوں نے کہا کہ وزیر داخلہ نے اجلاس میں بتایا کہ 20 جون تک دہلی حکومت کوویڈ 19 کی روزانہ 18،000 ٹیسٹ شروع کردے گی۔
انہوں نے کہا کہ کنٹونمنٹ زون میں ڈور ٹو ڈور کورونا ٹیسٹ ہوں گے۔ دہلی میں 242 کنٹونمنٹ زون ہیں۔
امیت شاہ کی زیرصدارت اجلاس میں دہلی بی جے پی صدر آدیش گپتا، دہلی کانگریس کے صدر چودھری انیل کمار اور عام آدمی پارٹی کے راجیہ سبھا کے رکن پارلیمنٹ سنجے سنگھ اور دیگر رہنما شریک ہوئے۔
دہلی میں کورونا انفیکشن سے متعلق گزشتہ 24 گھنٹوں میں وزیر داخلہ کا یہ تیسرا اجلاس ہے۔ اتوار کے روز، دہلی حکومت اور اس کے بعد تینوں کارپوریشنوں کے میئروں سے ملاقات کرکے کئی اہم فیصلے کئے گئے ہیں۔ نشست میں صحت اور خاندانی بہبود کے مرکزی وزیر ڈاکٹر ہرش وردھن، لیفٹیننٹ گورنر انیل بیجل، وزیر اعلی اروند کیجریوال بھی موجود تھے۔
کورونا معاملے میں دہلی کا ملک میں تیسرا نمبر ہے۔ گزشتہ تین دن سے دارالحکومت میں دو ہزار سے زیادہ انفیکشن کے معاملے رپورٹ ہوئے ہیں۔ اتوار کے روز 2224 انفکشن کا معاملہ درج کیا گیا جس سے متاثرہ افراد کی مجموعی تعداد 41182 ہوگئی ہے اور مرنے والوں کی تعداد 1327 ہوگئی ہے۔
