دارالحکومت دہلی میں کورونا وائرس کی مہلک وبا سے متاثر ہونے والے افراد کی تعداد 11 ہزار سے تجاوز کر گئی ہے جب کہ ان میں مرنے والوں کی تعداد 170 کے پار ہے۔
اسی دوران آل انڈیا کانگریس کمیٹی کے رکن مرزا جاوید علی نے یہ اعلان کیا ہے کہ کورونا وائرس سے مرنے والے افراد کے لواحقین جو دہلی گیٹ قبرستان میں تدفین کے لیے لے کر آتے ہیں انہیں پی پی ای کٹز مفت مہیا کرائی جائیں گی۔
مرزا جاوید نے بتایا کہ دہلی میں کورونا سے مرنے والے افراد کی تعداد میں مسلسل اضافہ ہوتا جا رہا ہے ایسے میں لواحقین جب قبرستان میں تدفین کے لیے آتے ہیں تو انہیں جے سی بی مشین کے اخراجات بھی خود ہی برداشت کرنے پڑتے ہیں۔
وہیں قبرستان کے آس پاس پی پی ای کٹز فروخت کر رہے دکاندار بھی من مانے داموں پر اسے فروخت کرتے ہیں، جس سے مرنے والے کے اہل خانہ پر اضافی بوجھ بڑھ جاتا ہے۔
مرزا جاوید نے دہلی حکومت سے اپیل کی کہ سرکار کو چاہیے کہ دہلی گیٹ قبرستان میں ایک سرکاری جے سی بی مشین رکھی جائے یا مرنے والوں کی مدد کے لیے دہلی وقف بورڈ کے ذریعے لواحقین کی مدد کی جائے۔
