ای ٹی وی بھارت سے بات چیت کرتے ہوئے پروفیسر اختر نے کہا کہ مسجد معاشرے کے تمام طبقات کے لیے خاص ہوگی اور اس نقطہ نظر سے ہم نے ایک سپر اسپیشیلٹی ہسپتال بنانے کا منصوبہ بنایا ہے، جس میں 200 سے 300 بیڈز کی گنجائش ہوگی اور لوگوں میں شعور پیدا کرنے کے لیے یہاں ایک آرکائیو بنایا جائے گا، جس میں تمام مذاہب کا تذکرہ کیا جائے گا۔
انہوں نے کہا کہ کیمپس کا فن تعمیر اسلامی ہے۔ اس میں اسلامی فن تعمیر کو دکھایا گیا ہے۔ یہ کیمپس اسلامی فلسفہ کی نمائش کرتا ہے ، جو انسانیت کو فوقیت دیتا ہے۔
یہ پوچھے جانے پر کہ مسجد کے ڈیزائن میں روایتی ہند اسلامی فن تعمیر کو کیوں نہیں پیش کیا گیا ہے تو پروفیسر اختر نے کہا کہ مسجد کا کیمپس عصری فن تعمیر پر مبنی ہے، کیونکہ معاشرہ نئے چیلنجوں مثلا توانائی ، آلودگی ، پارکنگ کے امور جیسے نئے چیلنجوں کا سامنا کر رہا ہے۔ اس لیے اس طرح کا فن تعمیر سے ہم ایسے چیلنجوں سے نمٹ سکتے ہیں۔
قابل ذکر ہے کہ رام جنم بھومی کیس میں درخواست گزار اقبال انصاری نے مجوزہ مسجد کے ڈیزائن کو مسترد کرتے ہوئے کہا ہے کہ مجوزہ مسجد میں ایک بھی نکتہ اسلامی ثقافت کی نمائندگی نہیں کرتا اور نہ ہی ان سے کوئی تجویز لی گئی ہے۔
جب ای ٹی وی بھارت نے پروفیسر اختر سے نئی مسجد کے مجوزہ ڈیزائن پر اقبال انصاری کی منظوری کے بارے میں پوچھا تو انہوں نے کہا، 'میں کسی بھی معاملے پر تنازعہ نہیں کرنا چاہتا۔ مجھے ایک مسجد کیمپس کے ڈیزائن کا کام ملا، تو میں نے وہ کیا۔ کچھ لوگ مخالفت کریں گے اور کچھ لوگ اس کی حمایت کریں گے۔
واضح رہے کہ مسجد احاطے کے لیے فن تعمیر کا منصوبہ 19 دسمبر کو ہند-اسلامی ثقافتی فاؤنڈیشن (IICF) کے ذریعہ جاری کیا گیا تھا، جو اتر پردیش حکومت اور ریاستی سنی وسطی وقف بورڈ کے ذریعہ تشکیل دی گئی ٹرسٹ ہے۔
آئی آئی سی ایف کے سکریٹری اطہر حسین کے مطابق ، ایودھیا مسجد کمپلیکس کی سنگ بنیاد 26 جنوری کو رکھی جائے گی۔
