کانفرنس کی صدارت تنظیم کے صدر شاں جہاں شاد نے کی، جبکہ مہمان خصوصی کی حیثیت سے سی اے اے، این آر سی کی مخالفت میں اپنے عہدہ سے استعفیٰ دینے والے انڈین پولیس سروس کے سینئر افسر عبد الرحمن شریک ہوئے، مہمان اعزازی کے طور پر روزنامہ انقلاب بہار کے ریزیڈنٹ ایڈیٹر و معروف صحافی احمد جاوید نے شرکت کی، کانفرنس میں شہر کے معزز دانشوران و سماجی کارکنان نے شرکت کی۔
مہمان خصوصی آئی پی ایس عبد الرحمن نے کہا کہ' رنگ ناتھ مشرا نے کہا تھا کہ' مسلمانوں کے حالات سماجی اور اقتصادی اعتبار سے بہت خراب ہیں، آج ایک پارٹی کی جانب سے ملک میں کمیونل ایجنڈا نافذ کرنے کی کوشش ہو رہی ہے، مسلمانوں کو دوسرا شہری بنا کر پیش کرنے کی حکومت عملی طور پر کام کر رہی ہے جسکی ہر حال میں مخالفت کرنی چاہیے۔
روزنامہ انقلاب کے ریزیڈنٹ ایڈیٹر احمد جاوید نے کہا کہ' ملک یا ریاست میں اقلیتوں کے ساتھ جو سوتیلا سلوک ہو رہا ہے وہ مرکزی و ریاستی حکومت کی ناکامی ہے، یہاں ہر شہری کی محافظ حکومت ہے مگر گزشتہ چند سالوں میں اقلیتوں کے تئیں ایک طبقہ کے لوگوں میں جو نفرت بھری ذہنیت بنائی گئی ہے اس کے تعلق سے ہمیں اور آپ کو فکرمند ہونا پڑے گا۔ ناگرک منچ کے صدر شاں جہاں شاد نے کہا کہ' کانفرنس کا مقصد سماج میں اقلیتوں کے مسائل اور اس کے حل سے لوگوں کو بیدار کرنا ہے ساتھ ہی تعلیمی، اقتصادی اور بے روزگاری کے اعتبار سے ہم کتنے پچھڑے ہیں اسے لوگوں کو باور کرانا ہے۔
