بہار کے شہر گیا میں مگدھ کمشنری کا واحد اقلیتی لسانی کالج مرزا غالب کالج کیش لیس ہوگیا ہے۔ کالج میں داخلہ فیس سمیت دیگر فیس کی رقم آن لائن ٹرانسفر ہو گی۔
شہر گیا میں واقع مرزا غالب کالج میں اب نقدی نہیں لی جائے گی۔
واضح رہے کہ مرزا غالب کالج گیا کے نام سے باضابطہ ایپ بنایا گیا ہے جس سے تمام طرح کا لین دین ہوگا۔
خاص طور پر طلبہ کو داخلہ فیس سے لیکر سبھی طرح کی فیس آن لائن ٹرانسفر کر کے آف لائن اس کی رسید جمع کرنی ہوگی یا پھر آن لائن ہی فیس جمع ہونے کی اطلاع دی جا سکتی ہے۔
اس کا مقصد غیر ضروری اخراجات یا پھر داخلہ کے نام پر کسی سے کوئی زیادہ رقم نہ لے سکے ان سب کا سد باب کرنا ہے۔
کیش لیس کالج اور ایپ کا افتتاح مگدھ یونیورسٹی کے وائس چانسلر پروفیسر راجندر پرساد آئندہ چھ مارچ کو کالج پہنچ کر کریں گے۔
اس موقع پر ایک تقریب بھی منعقد ہوگی جس میں یونیورسٹی کے دیگر عہدیداروں سمیت شہر اور اطراف کے معززین شریک ہوں گے تاہم اس تقریب کی تیاری زوروں شور سے ہو رہی ہے۔
کالج کے سکریٹری سید شبیع عارفین شمسی نے بتایا کہ کیش لیس کالج ہونے سے بدعنوانی سے پاک صاف معاملہ ہوگا۔
کالج کے نام سے ایپ اور ویپ سائٹ بھی بنائی گئی ہے جس سے طلبہ اپنا اسٹیٹس دیکھ سکیں اور ان کے گارجین بھی بچوں کی تعلیم سے متعلق جانکاری حاصل کر سکتے ہیں۔
انہوں نے بتایا کہ گیا میں مگدھ یونیورسٹی کا واحد کالج ہے جہاں روپے کی لین دین آن لائن ہوگی۔
انہوں نے کہا کہ کالج کے لیے یہ انتہائی ضروری تھا کیونکہ جب مالی کام آن لائن ہوگا تو کسی کو کسی نام پر بدعنوانی کرنا مشکل ہوگا۔
ساتھ ہی انہوں نے پروگرام سے متعلق بتایا کہ چھ مارچ کو کالج میں واقع محی الدین ہال میں تقریب ہو گی اور اسی میں اس کا افتتاح وائس چانسلر کریں گے۔
