مدھیہ پردیش کانگریس کے صدر کمل ناتھ نے ریاست میں ہونے والے اسمبلی ضمنی انتخابات پر کہا کہ ریاست کے نوجوانوں کا مستقبل انہیں انتخابات سے طے ہوگا۔ انہوں نے یہ بھی کہا کہ ضمنی انتخابات یہ طے کریں گے کہ سیاست کس پارٹی کی چلے گی اور اس کے باعث نوجوانوں کا مستقبل کیا ہوگا۔
انہوں نے مزید کہا کہ ہم نے اپنے پندرہ ماہ کی حکومت میں اپنی پالیسیز کا تعارف پیش کیا۔ انہیں اس کے لیے کسی بی جے پی کے رہنما کا سرٹیفیکیٹ نہیں چاہیے بلکہ عوام اس کی گواہ ہے۔
یہ بھی پڑھیں:
ہنگامہ کرنے کے الزام میں راجیہ سبھا کے آٹھ اراکین معطل
سابق وزیر اعلی نے کہا کہ بی جے پی ان سے 15 ماہ کا حساب مانگ رہی ہے۔ پہلے وہ پندرہ سالوں کا حساب دے۔ انہوں نے بی جے پی حکومت کے دورِ اقتدار میں منعقدہ 'انویسٹر میٹ' پر نشانہ لگایا اور کہا کہ کتنے انویسٹرز میٹنگز ہوئیں۔ لاکھوں کروڑوں کی سرمایہ کاری کے وعدے کیے گئے لیکن سرمایہ کاری نہیں آئی۔
انہوں نے کہا کہ سرمایہ کاری لانے کے لیے اعتماد کی فضا پیدا کرنے کی ضرورت ہوتی ہے۔ انہوں نے کہا کہ ہم نے ریاست کے 26 لاکھ کسانوں کا قرض معاف کیا لیکن بی جے پی اس کے تعلق سے جھوٹے بیان دیکر ریاست کے عوام کو گمراہ کرنے کی کوشش کر رہی ہے، جو اب چلنے والا نہیں ہے۔
انہوں نے بی جے پی کے رہنماؤں کو کہا کہ آمنے سامنے بٹھایا جائے تب وہ انہیں 26 لاکھ کسانوں کے نام، ان کے گاؤں کا نام، معاف کی گئی رقم کا ریکارڈ دستیاب کرانے کو تیار ہیں۔
