بھوپال: فوٹو گرافر اور ویڈیو گرافر بھکمری کے دہانے پر

ریاست مدھیہ پردیش کے دارالحکومت بھوپال میں مسلم طبقہ بڑی تعداد میں ویڈیو گرافی اور فوٹو گرافی سے جڑا ہوا ہے جو شادیوں اور دیگر پروگرام کے ذریعے اپنی روزی روٹی کماتا چلا آ رہا تھا لیکن کورونا وائرس کی وجہ سے لاک ڈاؤن میں شادیوں کا پورا سیزن ختم ہوگیا ہے اور حالت یہ ہے کہ اب یہ لوگ بھکمری کے دہانے پر پہنچ چکے ہیں۔

فوٹوگرافرز اور ویڈیوگرافرز نے لاک ڈاؤن سے پہلے ہی ویڈیو گرافی اور فوٹو گرافی سے جڑے کیمرے (ای ایم آئی) پر خرید لیے تھے تاکہ شادیوں میں ہونے والی اچھی کمائی کے بعد وہ اس کی قسط دھیرے دھیرے ادا کر سکیں لیکن شادیوں کا سیزن چلے جانے اور اب شادیوں میں کم تعداد میں لوگوں کے شریک ہونے سے ان کے کاروبار پر بڑا اثر پڑا ہے-

اب یہ ویڈیو گرافر اور فوٹو گرافر اپنا گھر چلانے کے لیے سبزیوں کے ٹھیلے لگا رہے ہیں یا پھر آٹو چلا کر یا دیگر کام کر اپنا گھر اور بچوں کو پال رہے ہیں- ان ویڈیو گرافر اور فوٹوگرافر کا حکومت سے مطالبہ ہے کہ انہیں مصیبت کی اس گھڑی میں سرکار کسی بھی طرح کی مدد کرے تاکہ انہیں کچھ راحت نصیب ہو۔