ریاست بہار میں پٹنہ کے بعد بھاگلپور کورونا وائرس سے سب سے زیادہ متأثر شہر ہے، جہاں بڑی تعداد میں فعال کیسز بھی درج کیے جارہے ہیں، آج بھاگلپور کے تلکا مانجھی یونیورسٹی کے متعدد ملازمین بھی کورونا سے متاثر ہوگئے ہیں، جس کے بعد تمام ملازمین کے کورونا کی جانچ کی جا رہی ہے، بدھ کو تقریبا سو افراد کے کورونا کی جانچ کی گئی تھی اور باقی ملازمین کا سمپل آج لیا گیا۔
تلکا مانجھی یونیورسٹی کے پی آر او ڈاکٹر دیپک کمار نے کہا کہ پوری یونیورسٹی میں جگہ جگہ ماسک لگانے والے پیغامات چسپاں کیے گئے ہیں، ساتھ ہی بنا ماسک کے ایڈمنسٹریشن بلڈنگ میں داخلہ پر پابندی عائد کر دی گئی ہے، حالانکہ عمارت میں متعدد طلباء و طالبات بغیر ماسک کے ہی نظر آئے، یونیورسٹی انتظامیہ کا کہنا ہے کہ یونیورسٹی احاطہ کو دن میں دو بار سینیٹائز کیا جا رہا ہے اور کورونا کے پروٹوکول پر بھی عمل کیا جا رہا ہے۔
انھوں نے کہا کہ یونیورسٹی میں کورونا مثبت کیسز کی تصدیق ہونے کے بعد وائس چانسلر نے تمام فزیکل میٹنگ منسوخ کر دی ہے اور ورچول میٹنگ کا فیصلہ کیا ہے، گزشتہ ایک سال سے یونیورسٹی میں ویسے بھی تعلیم و تدریس کا سلسلہ متاثر ہوا ہے لیکن تازہ معاملے نے تشویش میں مزید اضافہ کر دیا ہے۔
