مہلک کورونا وائرس کے خلاف اٹھائے گئے موثر قدم لاک ڈاؤن کے نفاذ کے دوران ماہ رمضان کی آمد ہوئی ہے۔ ایسے میں بھاگلپور کے کثیر مسلم آبادی پر مشتمل تاتارپور چوک اس دفعہ رمضان میں وہ تمام تر رونقوں سے محروم رہیں گی، جو گذشتہ رمضانوں کے مواقع پر دیکھنے کو ملتی تھی۔
افطار و سحر کے مبارک اوقات میں بھی لوگ اپنے گھروں میں محصور ہوکر رہ گئے ہیں۔
تاتارپور چوک پر واقع سو سالہ جامع مسجد میں نماز اور تراویح کے لیے اتنے نمازی جمع ہوتے تھے کہ مسجد کے باہر لوگوں کو نماز پڑھنی پڑتی تھی، لیکن لاک ڈاؤن کی وجہ سے صرف چار لوگوں کو نماز ادا کرنے کی اجازت دی گئی ہے اور تراویح میں بھی امام صاحب مؤذن اور مسجد کی دیکھ ریکھ کرنے والا ایک شخص رہےگا۔
رمضان کے دنوں میں جہاں ریلوے اسٹیشن تک جانے والی اس مین شاہراہ پر مختلف طرح کی ریڑیاں لگائی جاتی تھیں اور سینکڑوں لوگوں کے لیے روزی روٹی کا ذریعہ ہوتی تھی وہاں آج سناٹا پسرا ہے، اور دکانوں میں تالے لگے ہوئے ہیں۔ پولیس کا سخت پہرہ ہے کہ بلا وجہ کوئی یہاں جمع نہ ہو۔
