بہار میں بھاگلپور ضلع کے بدھو چک تھانہ علاقہ سے اتوار کی شام لاپتہ ہوئے تین بچوں کی لاشیں برآمد کی گئی ہیں۔
کہلگاؤں سب ڈویژنل پولیس افسر ڈاکٹر ریشو کرشن نے بتایاکہ رانی دیارا گاؤں باشندہ گن پت پاسوان کے بیٹے امت کمار (14) ، سہندر پاسوان کے بیٹے ابھیشیک کمار (11) اور دلیپ پاسوان کے بیٹے امن کمار (10) اتوار کی شام لاپتہ ہوگئے تھے۔ تینوں کی لاشیں سڑک کنارے پانی سے بھرے گڑھے سے بر آمد کی گئی ہیں۔
بچوں کے جسم پر چوٹ کے نشان پائے گئے ہیں۔ فوت ہوئے بچوں کے والد سگے بھائی ہیں۔ متوفیوں کے اہل خانہ کی تحریری درخواست پر دو لوگوں کے خلاف قتل کا معاملہ درج کیا گیا ہے۔
دریں اثناء بچوں کے مبینہ قتل سے مشتعل اہل خانہ نے لاشوں کو سڑک پر رکھ کر آمد ورفت کو متاثر کر دیا۔ وہ لوگ ہر ایک متوفی کے اہل خانہ کو دس دس لاکھ روپے معاوضہ اور قصوروار افراد کی بلا تاخیر گرفتاری کا مطالبہ کر رہے ہیں۔
وہیں پیر پینتی کے رکن اسمبلی رام ولاس پاسوان نے موقع پر پہنچ کر متوفیوں کے اہل خانہ سے ملاقات کی ہے۔
