ریاست کرناٹک کے ضلع یادگیر میں طلبا کے لیے پریس کلب میں ڈیجیٹل لائبریری کا قیام عمل میں لایا جا رہا ہے۔ ڈپارٹمنٹ آف پبلک لائبریری کے ڈائریکٹر ڈاکٹر ستیش کمار نے یادگیر پریس کلب میں میڈیا سے بات کرتے ہوئے کہا کہ ضلع کے پریس کلب میں ڈیجیٹل لائبریری کا قیام دیگر اضلاع کے لیے ایک مثال ہے۔
انہوں نے کہا کہ کرناٹک یونین آف ورکنگ جرنلسٹ ایسوسی ایشن یادگیر کے صدر آندودھر اور سکریٹری راجیش پاٹل نے یادگیر پریس کلب کے ایک حصے میں ڈیجیٹل لائبریری اور عوامی لائبریری کے قیام پر تعاون کرنے اور ضروری چیزوں کو مہیا کرنے کا وعدہ کیا ہے جس کے لیے ہم ان کے شکر گزار ہیں۔
انہوں نے کہا کہ ضلع یادگیر میں ڈیجیٹل لائبریری کے ایک لاکھ 49 ہزار ارکان ہیں جو اس ڈیجیٹل لائبریری سے استفادہ کر رہے ہیں۔
انہوں نے کہا کہ ضلع یادگیر کے اطراف و اکناف کے کالج اور ہاسٹل میں قیام پذیر طلبا و طالبات کی سہولت کی خاطر یادگیر پریس کلب میں ڈیجیٹل لائبریری اور عوامی لائبریری کا قیام عمل میں لایا جارہا ہے۔
انہوں نے کہا کہ ریاست کرناٹک میں ایک کروڑ 61 لاکھ ارکان بنائے گئے ہیں جو پورے ملک میں کسی بھی ریاست میں ڈیجیٹل لائبریری کے سب سے زیادہ ممبرز ہیں۔ یہ ارکان صرف ایک سال سے کچھ زیدہ عرصہ میں بنائے گئے ہیں۔
مزید پڑھیں:
یادگیر: وسیم رضوی کے خلاف ایم آئی ایم کی احتجاجی ریلی
انہوں نے مزید کہا کہ اپنے موبائل میں ای پبلک لائبریری کے نام سے ایپ ڈاؤن لوڈ کرکے مختلف زبانوں میں موجود کتابوں سے استفادہ کیا جا سکتا ہے۔
