ایک تیز رفتار کار کے لاری سے ٹکرانے کے نتیجہ میں حاملہ خاتون کے ساتھ کار میں سوار 7 افراد کی موقع پر ہی موت ہوگئی جبکہ ایک خاتون زخمی ہوئی ہے۔
حاملہ خاتون عرفانہ بیگم (25 سالہ) کو کار میں الند روڈ سے ڈیلیوری کے لئے گلبرگہ لایا جا رہا تھا کہ گلبرگہ شہر کے نواحی علاقے میں المناک سڑک حادثہ پیش آیا۔ ٹکر اس قدر زبردست تھی کہ کار اور لاری دونوں ہی الٹ کر سڑک سے نیچے جا گری اور کار کا اگلا حصہ مکمل طور پر چکنا چور ہوگیا۔ کار کے حصوں کو کا ٹ کر لاشوں کو باہر نکالا گیا۔
بتایا جاتا ہے کہ ہلاک ہونے والے تمام افراد ایک ہی خاندان کے تھے۔
ہلاک شدگان کی شناخت عرفانہ بیگم (حاملہ خاتون 25 سالہ)، رابعہ بیگم (50 سالہ)، عابدہ بیگم (50 سالہ)، زیتون بی (60 سالہ)، منیر علی (28 سالہ)، محمد علی (29 سالہ) اور شوکت علی (29 سالہ) کے طور پر ہوئی ہے جبکہ شبانہ بیگم نامی 44 سالہ خاتون شدید طور پر زخمی ہوئی ہے۔
گلبرگہ الند روڈ پر سے گزرنے والی گاڑیوں نے پولیس کو اطلاع دی جس کے بعد گلبرگہ ٹریفک پولیس نے جائے حادثہ پر پہنچ کر کار سے لاشوں کو باہر نکالا اور پوسٹ مارٹم کے لیے روانہ کیا۔
