یادگیر: مولانا ابوالکلام آزاد اردو ہال 9 برس سے زیر تعمیر

کرناٹک میں اردو زبان سے جڑی ہر شے کا عجیب معاملہ ہے۔ وہ چاہے اردو اکیڈمی ہو، اردو رسائل و جرائد ہوں یا پھر اردو ہال ہو، ریاستی حکومت امبیڈکر بھون، والمیکی بھون، سیوا لال بھون، کمیونٹی بھون، رنگ مندر جیسے تعمیراتی عمارتوں کو ایک تا دو سال میں تعمیر کر لیا جارہا ہے لیکن یہ قابل افسوس بات ہے کہ اردو ہال جس کا سنگ بنیاد نو سال قبل رکھا گیا تھا جس کی تعمیر بھی تقریبا مکمل ہوگئی ہے لیکن لینڈ آرمی تعمیری محکمے نے ابھی تک مولانا عبدالکلام آزاد اردو ہال وقف بورڈ کے حوالے نہیں کیا ہے۔

تعجب اس بات پر بھی ہے کہ مولانا عبدالکلام آزاد اردو ہال سرکاری اراضی کے بجائے وقف بورڈ کی جگہ پر تعمیر کیا جارہا ہے، اس کے باوجود اس کی تعمیر کےلیے 9 سال سے زائد کا عرصہ گذر چکا ہے لیکن ابھی تک اس کی تعمیر مکمل نہیں ہوئی ہے۔

ضلع وقف افسر عبدالرب نے ای ٹی وی بھارت سے خصوصی بات کرتے ہوئے مولانا ابوالکلام اردو ہال سے متعلق کہا کہ فروری میں ٹرانسفر ہوکر یادگیر آیا تب سے میں مسلسل اردو ہال اور ٹیلرنگ سنٹر سے متعلق جانکاری حاصل کرتے ہوئے لینڈ آرمی کے ذمہ داران کو جلد از جلد لیڈیز ٹیلرنگ سنٹر اور مولانا ابوالکلام اردو ہال وقف بورڈ کے حوالے کرنے کی اپیل کی ہے۔

انہوں نے کہا کہ بلڈنگ تیار ہوچکی ہے مزید کچھ چھوٹے موٹے کام باقی ہیں جس کو دو ماہ میں مکمل کرکے وقف بورڈ کے حوالے کرنے کا لینڈ آرمی کے ذمہ داروں نے وعدہ کیا ہے۔ اب دیکھنا یہ ہے کہ جو کام 9 سالوں میں نہیں ہو پایا وہ دو مہینے میں ہو پائے گا یا پھر یہ سال بھی اسی طرح گزر جائے گا۔