ریاست کرناٹک کے ضلع یادگیر کی ڈپٹی کمشنر ڈاکٹر راگا پریا نے کلیان کرناٹک ریجن ڈیولپمنٹ بورڈ کے ترقیاتی کاموں کا جائزہ لیتے ہوئے عہدیداران سے کہا کہ ’’ترقیاتی کاموں کو دی گئی مدت کے دوران ہی مکمل کر لیا جائے۔‘‘
انہوں نے متعلق محکمہ جات اور افسران سے ضلع یادگیر میں جاری ترقیاتی کاموں میں پیش رفت کی تفصیلات فوری طور پر یادگیر ضلع انتظامیہ کو پیش کرنے کے بھی احکامات جاری کیے۔
ماہ اکتوبر میں کلیان کرناٹک ڈیولپمنٹ بورڈ کے تحت ضلع یادگیر میں ترقیاتی کا موں کا تخمینہ 19.349 کروڑ روپے لگایا گیا ہے۔ جس میں سے کیے گئے ترقیاتی کاموں کے لیے 9.58 کروڑ روپے فنڈ کو استعمال کیا جا چکا ہے۔
ڈپٹی کمشنر ڈاکٹر راگا پریا نے کہا: ’’عہدے داران کو چاہیے کہ وہ ترقیاتی کاموں میں معیار کا خاص خیال رکھیں اور ان کی یہ بھی ذمہ داری ہے کہ وہ ترقیاتی کاموں کو دی گئی مدت کے دوران ہی مکمل کر لیں۔‘‘
اجلاس میں ضلع پنچایت سی ای او شلپا شرما، ضلع پنچایت منصوبہ بندی آفیسر سنیل بسواس، پبلک ورک ڈیولپمنٹ ایگزیکٹو انجینئر دیوداس چوہان خواتین واطفال ترقیاتی محکمہ ڈائریکٹر ڈاکٹر پربھاکر اور دیگر ضلعی سطح کے عہدیداران موجود تھے۔
