مقامی لوگوں نے سرکاری محکمہ صحت کے ارکان پر حکومت کی جانب سے اس مہلک وبا سے ہلاک ہونے والے افراد کی تدفین کے لیے مقرر کردہ رہنمایانہ اصولوں کی کھلی خلاف ورزی کرنے کا الزام عائد کیا اور اسے انسانیت کے خلاف عمل قرار دیا۔
اس معاملے کے منظر عام پر آنے کے بعد عوام کی طرف سے شدید نکتہ چینی کرنے پر مقامی حکام نے اس واقعہ کی جامع تحقیقات کیے جانے کا حکم جاری کر دیا ہے۔
یہاں یہ بات واضح کر دی جارہی ہے کہ ریاستی وزیر صحت کا تعلق ضلع بلاری سے ہی ہے۔
متعلقہ محکمہ کے ایک اعلیٰ افسر کا کہنا ہے کہ وہ اس معاملہ کی جامع تحقیقات کر رہے ہیں۔ شوشل میڈیا پر ایک ویڈیو وائرل ہو رہا ہے جس میں یہ دکھایا جارہا ہے کہ ایک بڑے سے ٹرک میں محکمہ صحت کے کارکنان پی پی ای پہنے ہوئے ہیں اور وہ سیاہ رنگ کی پلاسٹک شیٹ میں لپٹی ہوئی لاشیں یکے بعد دیگرے لاتے چلے جا رہے ہیں اور ایک بڑے گڑھے میں گراتے جارے ہیں۔ یہ لاشیں وہ ایک ہی گڑھے میں گرا رہے ہیں۔ گویا انہوں نے ان لاشوں کو اجتماعی طور پر دفن کر دیا۔
بلاری ڈپٹی کمشنر ایس ایس ناکل نے کہا کہ 'انہوں نے بھی اس ویڈیو کا مشاہدہ کیا ہے۔'
انہوں نے کہا کہ 'ہم نے اس معاملہ کی انکوائری کا حکم جاری کر دیا ہے۔'
انہوں نے کہا کہ 'منگل کے دن کووڈ 19 سے مزید پانچ افراد کی موت واقع ہوئی ہے اور اس طرح ضلع میں اس مرض سے مرنے والوں کی تعداد بڑھ کر 29 ہو چکی ہے۔'
واضح رہے کہ پیر کے دن ضلع بلاری میں ایک ساتھ 12 کووڈ 19 اموات ہوئی تھیں۔
پڈوچیری میں اس ماہ کے شروع میں کووڈ 19 سے ہلاک ہونے والے ایک 44 سالہ شخص کی لاش کو ایک گڑھے میں اسی طرح سے پھینک دیا گیا تھا اور اس واقعہ پر مقامی عوام نے کافی غم و غصے کا اظہار کیا تھا اور اس کے بعد محکمہ صحت کے پانچ ملازمین کو خدمات سے برطرف کیا گیا تھا۔
