اتر پردیش کے ضلع بریلی میں ایمبولینس ڈرائیوروں نے اپنے مطالبات سے متعلق ضلع اسپتال کے احاطے میں دھرنا دیا اور مظاہرہ کیا۔ ایمبولینس ڈرائیوروں نے حکومت پر الزام لگایا کہ متعدد بار اپنے مسائل بیان کرنے کے باوجود حکومت نے ان کے مسائل حل کرنے پر غور نہیں کیا۔ جب اس کا کوئی حل نہیں نکلا تو آج ضلع ہسپتال میں ایمبولینس نمبر 102 کے ملازمین نے پہیا جام کر دیا ہے۔ ضلع بھر میں ایمبولینس نمبر 102 کی 43 گاڑیاں موجود ہیں۔
کورونا فائٹر اپنی تنخواہوں کے لئے دھرنے پر عالمی وبا کورونا وائرس کی وجہ سے جہاں زندگی تھم سی گئ ہے۔ لوگ کورونا وائرس مثبت افراد کے قریب جانے سے گریز کر رہے ہیں، وہاں ایمبولینس ڈرائیورس کورونا فائٹر بنکر شانہ بشانہ کھڑے نظر آ رہے ہیں۔ لوگ ان ڈرائیورس کو کورونا فائٹر کے خطاب سے بھی نواز رہے ہیں لیکن یہ خطاب صرف کاغذوں میں نظر آ رہا ہے۔ زمینی حقیقت اس خطاب کے برخلاف نظر آ رہی ہے۔
حقیقت یہ ہے کہ ان ڈرائیورس کو گزشتہ تین مہینے سے تنخواہ نہیں ملی ہے۔ گھروں میں معاشی بحران کی وجہ سے انکی زندگی فاقہ کشی کے دہانے پر آکر کھڑی ہو گئ ہے۔
بریلی ضلع کی یونین نے ضلع ہسپتال احاطے میں دھرنا دیا۔ اسٹیٹ یونین کے ریاستی صدر ہنومان پانڈے نے ہیڈ آفس جاکر اعلیٰ افسران سے رابطہ کیا لیکن افسران نے بھی تنخواہ دینے میں اپنی مجبوری کا اظہار کیا۔ جس پر ریاستی کمیٹی کے عہدے داران گذشتہ 25 جون سے ہیڈ آفس گیٹ پر ہڑتال پر بیٹھے ہیں۔
