اکھلیش یادو نے بریلی سرکٹ ہاؤس میں صحافیوں سے گفتگو کے دوران کہا کہ' سماجوادی پارٹی اعظم خان کےساتھ کھڑی ہے، حکومت کسی کو بچانے کے لیے ایک شخص کو پھنسانے کی کوشش کررہی ہے'۔
انہوں نے کہا کہ حکومت ایک طرف جنسی زیادتی کے ملزم کو بچانے کی کوشش کر رہی ہے اور دوسری جانب اعظم خاں کو پھنسا نے کا کام کر رہی ہے۔ شاہجہاں پور سے لے کر رامپور تک کیا ہو رہا ہے، وہ کسی سے پوشیدہ نہیں ہے۔ ان کا اشارہ اعظم خان اور چنمنانند کی طرف تھا۔
اس موقعے پر انہوں نے کہا کہ مرکز میں بیٹھے لوگ کشمیر میں پچاس سے ساٹھ لاکھ لوگوں کو قید کردیا ہے۔ لوگوں سے آزادی کا حق چھین لیا گیا ہے۔ اگر یہی صورتحال رہی تو وہ دن دور نہیں جب اتر پردیش میں بھی ایسے حالات پیدا ہو جائیں گے۔
پارٹی کے سرپرست ملائم سنگھ یادو سے لوہیا ٹرسٹ خالی کرائے جانے کے سوال پر انہوں نے کہا کہ' اس معاملے میں انہیں کوئی معلومات نہیں ہے۔ شاید خالی کرانے کی بات پہلے سے چل رہی تھی۔
انہوں نے مزید کہا کہ مرکزی حکومت اپنے دوسرے اقتدار کے سو دن مکمل ہونے کا جشن منا رہی ہے، جبکہ ملک میں کساد بازاری کا دور چل رہا ہے۔ بڑے بڑے کارخانے اور شورومز مقفل ہو رہے ہیں۔
آٹوموبائل کے شعبے کی صورت حال کسی سے پوشیدہ نہیں ہے۔ بریلی شہر میں جو کام سماجوادی پارٹی کے دور میں ہو رہے تھے، وہی اب تک مکمل نہیں ہوئے ہیں۔ انہوں نے مزید کہا کہ ریاست میں سماجواوی پارٹی عظیم اتحاد کے ختم ہونے کے بعد تنہا انتخاب میں حصہ لے گی'۔
