گلمرگ: آگ کی واردات میں متعدد دکانیں خاکستر

وادی کشمیر کے مشہور و معروف سیاحتی مقام گلمرگ میں سنیچر کی صبح آگ کی ایک ہولناک واردات میں ایک درجن کے قریب دکانیں خاکستر ہو گئیں۔

نمائندے کے مطابق گلمرگ میں سنیچر کی صبح ایک دکان سے اچانک آگ نمودار ہوئی جس نے آنا فانا دیگر دکانوں کا اپنی چپیٹ میں لے لیا۔

گرچہ فائر اینڈ ایمرجنسی سروسز نے آگ پر قابو پا لیا تاہم اس دوران ایک درجن کے قریب دکانیں مکمل طور خاکستر ہو گئیں۔

آگ لگنے کی وجوہات فوری طور معلوم نہ ہو سکیں تاہم اس ضمن میں پولیس نے معاملہ درج کرکے مزید کارروائی شروع کر دی ہے۔

متاثرہ دکانداروں نے گورنر انتظامیہ سے انکی بازآبادکاری کے لیے معاوضے کی اپیل کی ہے۔