بانڈی پورہ: گورنمنٹ پالی ٹیکنک کالج کے نئے کمپلیکس کا افتتاح

پرنسپل سکریٹری اسکل ڈیولپمنٹ ڈاکٹر اصغر سامون نے بانڈی پورہ ضلع کے واٹ پورہ گاؤں میں گورنمنٹ پالی ٹیکنیک کالج کے نئے کمپلیکس کا افتتاح کیا۔ اس موقع پر ان کے ہمراہ وائس چیئرمین ڈسٹرکٹ ڈویلپمنٹ کونسلر شفیق، ایڈیشنل ڈسٹرکٹ ڈویلپمنٹ کمشنر علی افسر خان، ایڈیشنل ڈپٹی کمشنر ظہور احمد میر، جوائنٹ ڈائریکٹر پلاننگ امتیاز احمد، ایگزیکٹو انجینئر جے کے پی سی سی، پرنسپل پالی ٹیکنیک کالج اور ضلع کے دیگر اعلیٰ افسران بھی موجود تھے۔

ڈاکٹر سامون نے کلاس رومز اور لیبز سمیت نئے کمپلیکس کا معائنہ کیا اور طلباء سے بات چیت کی۔ انہوں نے بتایا کہ مذکورہ کمپلیکس کو گورنمنٹ پالی ٹیکنک کالج کےلیے 18 کروڑ روپے کی لاگت سے تعمیر کیا گیا۔ طلباء اور کالج کے عملے کے ساتھ بات چیت کے دوران، کالج میں بنیادی سہولیات سے متعلق جاری کردہ مختلف امور پر تبادلہ خیال کیا گیا جن میں اسکالرشپس، عملے کی تعداد اور صلاحیت میں مزید اضافہ کرنا شامل ہیں۔

انہوں نے موجودہ سہولیات میں اضافے کی یقین دہانی کرائی اور طلباء پر زور دیا کہ وہ سہولیات سے استفادہ کریں۔ انہوں نے طلبا سے خود کو ہنر سے آراستہ کرنے پر زور دیا تاکہ مارکیٹ میں روزگار کے قابل بن سکے۔ انہوں نے کہا کہ طلباء کو مختلف ہنر مندی کے لیے اضافی کورسز فراہم کیے جائیں گے اور کہا کہ مختلف شعبوں میں ہنر مند نوجوانوں کو سامنے لانے کے لیے پلیسمنٹ ڈرائیوز بھی منعقد کی جائیں گی۔ ڈاکٹر سامون نے کہا کہ حکومت ہنر مند نوجوانوں کے لیے بھرتی مہم کو منظم کرنے کے لیے مختلف قومی اور ملٹی نیشنل کمپنیوں کے ساتھ رابطے میں ہے۔