مہاراشٹر کے اورنگ آباد میں فرقہ وارانہ کشیدگی کی افواہوں کو لے کر اورنگ آباد میں ایک امن کانفرنس منعقد ہوئی۔
اس کانفرنس میں پولیس کمشنر چرنجیوی پرساد نے شہریوں سے امن وامان کی برقراری کی اپیل کی۔ اس موقع پر شہریوں نے پچھلے دو برس میں پولیس کی کارکردگی کی ستائش کی اور اس بات کا یقین دلایا کہ ہر حال میں شہر کو پُرامن رکھنے میں ایک دوسرے کے ساتھ تعاون کریں گے۔
اورنگ آباد کے گندھرو ہال میں منعقد اس اجلاس میں پہلی بار ایسا ہوا کہ ڈائس پر بیٹھے افراد سامنے موجود شہریوں کی تجاویز سن رہے تھے۔ تجاویز سننے والوں میں پولیس کمشنر چرنجیوی پرساد بھی شامل تھے۔
شہریوں نے امن وامان میں رخنہ ڈالنے والے عناصر کی طرف اپنے اپنے انداز میں اشارے کیے ساتھ ہی پولیس کی کارکردگی کو بھی اجاگر کیا اور اس بات پر زور دیا کہ انتخاب سے قبل شرپسندوں کی سرکوبی کو یقینی بنایا جائے تاکہ مذہب کے نام پر نفرت کی سیاست کی کوئی گنجائش نہ رہے۔
پولیس کمشنر چرنجیوی پرساد نے شہریوں کی تجاویز کا خیر مقدم کیا۔ پولیس کمشنر نے کہا کہ فرقہ پرستی کو برداشت نہیں کیا جائیگا۔
اورنگ آبادشہر کو فرقہ وارانہ لحاظ سے حساس مانا جاتا ہے۔
