مہاراشٹر کے شہر اورنگ آباد میں کورونا متاثرین کی تعداد میں مسلسل اضافہ کے پیش نظر آئندہ ہفتے کبھی بھی دس دن کے لیے دوبارہ لاک ڈاؤن لگایا جا سکتا ہے۔
اورنگ آباد میونسپل کمشنر آستک کمار پانڈے نے کہا کہ ضلع کلکٹر، پولیس کمشنر اور ڈیزاسٹر مینجمنٹ کی میٹنگ کے بعد ہی لاک ڈاؤن کا فیصلہ لیا جائے گا۔
ای ٹی وی بھارت سے بات کرتے ہوئے اورنگ آباد میونسپل کارپوریشن کے کمشنر آستک کمار پانڈے نے بتایا کہ اورنگ آباد میں کورونا متاثرین کی تعداد میں روز بروز اضافہ ہو رہا ہے
اسی ضمن میں 7 مارچ بروز اتوار شام 5 بجے اورنگ آباد ضلع کلکٹر کے گھر پر ایک میٹنگ منعقد کرنے کا فیصلہ کیا گیا ہے، جس میں اورنگ آباد ضلع کلکٹر، پولیس کمشنر اور میونسپل کارپوریشن کمشنر شامل ہوں گے، جس میں لاک ڈاؤن نافذ کرنے کا فیصلہ لیا جا سکتا ہے۔
اورنگ آباد میں کورونا متاثرین کی تعداد ایک مارچ سے تشویشناک بنی ہوئی ہے، یکم مارچ کو 225، 2 مارچ کو 325، 3 مارچ کو 371، 4 مارچ 257 اور 5 مارچ کو 459 کورونا مریض کی تصدیق کی گئی ہے۔
