ریاست مہاراشٹر کے شہر اورنگ آباد میں گزشتہ کئی دنوں سے مسلسل کورونا کے مریضوں میں اضافہ ہورہا ہے، جس کی وجہ سے ضلع انتظامیہ کورونا پر قابو پانے کے لیے سخت اقدامات بھی اٹھا رہی ہے۔
انھیں سخت اقدام میں سے ایک اہم قدم یہ ہے کہ ضلع انتظامیہ نے اورنگ آباد شہر میں کورونا پر قابو پانے کے لیے بیرون شہر سے آنے والے ہر شخص کا کورونا ٹیسٹ کروایا جا رہا ہے، شہر سے منسلک چھ راستوں کے ٹول پلازوں پر میونسپل انتظامیہ نے چیک پوائنٹ بنائے ہیں، جن پر میونسپل کارپوریشن کے شعبہ ہیلتھ کے ڈاکٹرز اور طبی عملہ تعینات ہیں۔
گزشتہ دو دنوں میں ان چیک پوائنٹس پر 92 سے زیادہ افراد کورونا پازیٹیو پائے گئے ہیں، اسی ضمن میں ای ٹی وی بھارت کے نمائندہ نے اورنگ آباد کے دولت آباد چیک پوائنٹ کا جائزہ لیا اور وہاں پر موجود محکمہ صحت کے لوگوں سے بات چیت کی۔
محمکہ صحت کے ملازم نے کہا کہ عوام کے تعاون سے کورونا کا ٹیسٹ کیا جارہا ہے اور آج اک شخص میں کورونا کی تشخیص کی گئی ہے، وہیں کورونا ٹیسٹ کرنے والے ڈاکٹر نے کہا کہ اب تک دولت آباد کے چیک پوائنٹ پر 23 لوگوں کا کورونا ٹیسٹ کیا گیا جس میں سے 3 لوگوں کی رپورٹ مثبت آئی ہے، انھوں نے مزید کہا کہ لوگوں کے احتیاطی تدابیر پر عمل نا کرنے کی وجہ سے کورونا کی دوسری لہر میں تیزی آرہی ہے۔
