مہاراشٹر کے ضلع اورنگ آباد میں بی جے پی کارکنان نے پارٹی کے ضلع صدر سنجے کینیکر کی قیادت میں کسانوں کو خریف کے سیزن میں آرہی پریشانیوں سے متعلق اورنگ آباد کے سرکاری بینکوں کے سامنے ریاستی حکومت کے خلاف احتجاج کیا۔
اس دوران بی جے پی کے ضلع صدر سنجے کینیکر نے کہا کہ بارش کے موسم کا آغاز ہوگیا ہے لیکن خریف سیزن کے لیے کسانوں کو فصل قرض کی فراہمی نہیں کی جا رہی ہے۔ اس کے باعث کسان میں سخت تشویش پائی جارہی ہے۔ ایسے میں کسانوں کے مسائل فوری طور پر حل کیا جانا چاہئے ۔
انہوں نے کہا کہ موسم بارش کے ساتھ ہی خریف سیزن کا بھی آغاز ہوتا ہے اور ان دنوں میں کسانوں کو کاشتکاری کے لیے قرض کی ضرورت ہے تاکہ وہ کھاد اور بیج خرید کر کھیتی کے کاموں میں مشغول ہو جائیں تاہم اول تو ان پر قرض کا بوجھ ہے اور دوسری طرف انہیں قرض بھی فراہم نہیں کیا جا رہا ہے۔ انہوں نے کہا کہ بینکوں میں چکر کاٹنے کے بعد بھی کسانوں کو قرض نہیں مل رہا ہے۔
بی جے پی نے ریاستی حکومت پر الزام عائد کیا ہے کہ حکومت نے جو کسانوں سے وعدے کیے تھے وہ بھی اب تک پورے نہیں کیے گئے اور نہ ہی کسانوں کا قرض معاف کیا ہے۔ بی جے پی کے صدر سنجے کینیکر نے کہا کہ اب تک 15 فیصد ہی کسانوں کا قرض حکومت نے معاف کیا ہے۔
