اننت ناگ: جموں و کشمیر کے ضلع اننت ناگ کے تھجیواڑہ کنیلون علاقہ میں عسکریت پسندوں اور سکیورٹی فورسز کے مابین تصادم کے دوران دو عسکریت پسند ہلاک ہوئے ہیں۔ رپورٹس کے مطابق علاقہ میں عسکریت پسندوں کی موجودگی کی مصدقہ اطلاع موصول ہونے کے بعد سکیورٹی فورسز نے علاقہ کو محاصرہ میں لیا، جوں ہی سکیورٹی فورسز نے علاقہ میں تلاشی کاروائی شروع کی تو وہاں پر چھپے عسکریت پسندوں نے ان پر فائرنگ کی جس کے بعد جوابی فائرنگ میں دو عسکریت پسندوں ہلاک ہوگئے ہیں، علاقہ میں سرچ آپریشن جاری ہے۔ Militants Killed in an Encounter
انکاؤنٹر میں ہلاک ہونے والے عسکریت پسندوں کی شناخت فیاض کمار اور اویس خان کے طور پر ہوئی ہے جن کا تعلق عسکریت پسند تنظیم انصار غزوہ الہند سے تھا۔ پولیس نے بتایا کہ یہ دونوں عسکریت پسند 03-07-2022 کو چینی ووڈر سری گفوارہ میں پولیس اہلکاروں پر ہوئے حملے میں ملوث تھے جس میں ایک پولیس اہلکار فردوس ڈار شدید زخمی ہو گیا تھا۔ اس کے علاوہ 12-08-2022 کو داراشکوہ پارک بجبہاڑہ میں ہوئے حملے میں یہی عسکریت پسند ملوث تھے جس میں قادر نام کا ایک اہلکار شدید زخمی ہوا تھا۔ پولیس نے مارے گئے عسکریت پسندوں کو 15-06-2022 کو پادشاہ باغ میں گرینیڈ حملے سمیت دیگر کئی واقعات میں بھی ملوث ہونے کا دعویٰ کیا ہے۔
