ضلع پلوامہ میں یوم قومی اتحاد کے تعلق سے محمکہ کھیل کود نے ایک بائیک ریلی کا اہتمام کیا جسے ضلع ترقیاتی کمشنر پلوامہ بصیر الحق چوہدری نے جھنڈی دکھا کر روانہ کیا۔ اس ریلی میں تقریبا 30 بائیک سواروں نے حصہ لیا۔ یہ ریلی ڈی سی آفس سے روانہ ہوئی اور پلوامہ کے گانگوہ میں پہنچ کر ختم ہوئی۔ اس ریلی کو احسن طریقے سے انجام دینے کے لیے جموں و کشمیر پولیس کے ساتھ ساتھ محکمہ ٹریفک نے اقدامات اٹھائے تھے۔
مزید پڑھیں: گاندربل پولیس نے تین لاپتہ لڑکیوں کو بازیاب کیا
اس موقع پر محکمہ یوتھ سروسز اینڈ اسپورٹس کے ملازمین کی جانب سے قومی اتحاد کے لیے کام کرنے کا حلف بھی لیا گیا۔ اس ریلی کا مقصد عوام میں بیداری پیدا کرنا تھا۔ اس موقع پر ضلع ترقیاتی کمشنر پلوامہ بصیر الحق چوہدری نے کہا کہ 'اس ریلی کا مقصد لوگوں میں بیداری پیدا کرنے کے ساتھ ساتھ آپس میں اتحاد قائم کرنا ہے'۔
واضح رہے کہ سردار ولبھ بھائی پٹیل کے یوم ولادت پر ہر ہرس 31 اکتوبر کو مرکزی حکومت کی جانب سے 'یوم قومی اتحاد' کے طور پر منایا جاتا ہے۔
