کھیلن پہلگام میں بادل پھٹنے سے فصلوں کو نقصان

جنوبی کشمیر کے ضلع اننت ناگ کے سیاحتی مقام پہلگام کے کھیلن علاقے میں بادل پھٹنے سے علاقے میں سیلابی صورتِ حال پیدا ہوگئی ہے۔ سیلابی صورت حال سے گاؤں کھیلن کی آراضی کو نقصان پہنچا ہے جب کہ کئی مقامات پر اخروٹ کے درختوں اور مکھی کی فصلوں کو بھی نقصان پہنچا ہے۔

منگل کو شام تقریباً 9 بجے کے بعد کھیلن علاقے کے پہاڑ پر بادل پھٹنے سے گاؤں میں سیلابی صورتحال پیدا ہوگئی ہے۔ بادل پھٹنے سے ویرسرن کھیلن میں سیلابی پانی سے مکئی کی فصلوں کو نقصان پہنچا ہے، وہیں ویرسرن سے کھیلن کی جانب جانے والا راستہ اور پل پوری طرح سے بہہ گیا۔

مقامی لوگوں نے ای ٹی وی بھارت سے بات کرتے کہا ہے کہ سیلابی پانی نے گاؤں کے مختلف مقامات پر عارضی پلوں کو بھی نقصان پہنچایا۔ ایک شہری جمعہ ڈوئی نے بتایا کہ ایک نالے پر پل نہ ہونے سے انہیں زبردست دقتوں کا سامنا کرنا پڑرہا ہے اور نالے میں سیلاب آنے کے بعد پوری آبادی محصور ہوکر رہ گئی ہے۔

ان کے مطابق متعدد بار انتظامیہ کو اس بارے میں گزارشات کی گئیں تاہم انتظامیہ نے اس بارے میں کوئی خاطر خواہ انتظام نہیں کیا۔ مقامی لوگوں نے ضلع انتظامیہ اور ایل جی انتظامیہ سے اس معاملے میں مداخلت اور امداد کرنے کی اپیل کی ہے۔