اینٹی کورپشن بیورو ( اے سی بی) کو ایک شکایت موصول ہوئی تھی کہ چند ایجنٹس، اے آر ٹی او دفتر کے عہدیداروں کے ساتھ مل کر رشوت کے بدلے مال بردار گاڑیوں، کمرشل گاڑیوں کی رجسٹریشن، فٹنس سرٹیفکیٹ اور ڈرائیونگ لائسنس جاری کر رہے ہیں۔
شکایت کے بعد، اینٹی کورپشن بیورو (اے سی بی) کو ڈرائیونگ ٹرائل ٹیسٹ کے روز کی گئی اچانک چھان بین کے دوران یہ پتہ چلا کہ ڈرائیونگ لائسنس کے اجرا کے لیے زیادہ تر درخواست فارمز پر پنسل سے تحریر کردہ کوڈ الفاظ موجود تھے۔ اس کی جانچ سے پتہ چلا کہ بورڈ ممبران ایجنٹوں کے ذریعے لائسنس کے خواہش مند افراد سے بطور رشوت رقومات وصول کر رہے ہیں۔
بتایا جا رہا ہے کہ ڈرائیونگ ٹیسٹ کے لیے حاضر ہوئے چند درخواست دہندگان نے اعتراف کیا کہ انہوں نے اے آر ٹی او آفس اننت ناگ کے بورڈ ممبروں کو ایجنٹوں کے ذریعے ڈرائیونگ لائسنس حاصل کرنے کے لیے رشوت دی تھی۔
اس کے علاوہ یہ بھی پتہ چلا کہ اے آر ٹی او دفتر سے منسلک افسران اور ایجنٹس کے درمیان اس سلسلہ میں فون پر چیٹس بھی ہوئی ہیں جس میں درخواست دہندگان کی تفصیلات اے آر ٹی او دفتر کے افسران کو ارسال کی گئی ہیں۔
اس سلسلہ میں اے آر ٹی او دفتر اننت ناگ کے افسران، ملازمین اور ملوث ایجنٹوں کے خلاف ایک ایف آئی آر زیر نمبر 4/2021 اے سی بی تھانہ اننت ناگ میں درج کیا گیا ہے۔
تفتیش کے دوران اینٹی کرپشن کورٹ اننت ناگ سے سرچ وارنٹ حاصل کیے گئے اور قاضی گنڈ میں اے آر ٹی او اننت ناگ شبیر احمد کی رہائش گاہ پر تلاشی لی گئی۔ وہیں، موٹر وہیکل انسپکٹرز جن میں ڈی کے مرگ کولگام کے رہنے والے شاہد محبوب، بمنہ سرینگر کے رہائشی منظور احمد اور سنت نگر سرینگر کے رہنے والے آصف امین کی رہائش گاہوں پر بھی تلاشی کارروائی کی گئی۔
مزید پڑھیں:
اس کے ساتھ ساتھ ایجنٹوں کی رہائش گاہوں اور دکانوں پر بھی چھاپے ڈالے گئے۔ ان میں قاضی باغ اننت ناگ کے خالد حکیم، لیسو گڈر کولگام کے رہنے والے مبارک بٹ، سرنل اننت ناگ کے ظہور احمد، کھنہ بل اننت ناگ کے اعجاز وگے، ندیم احمد، ندیم فوٹو اسٹیٹ لال چوک اننت ناگ، ڈی سی دفتر اننت ناگ کے قریب فاروق میر، نذرانہ فوٹو سیٹ کی تلاشی لی گئی۔
دوران تلاشی مختلف دستاویزات ضبط کی گئیں۔ کیس کی مزید تفتیش جاری ہے۔
