ریاست اترپردیش کے ضلع علی گڑھ میں کورونا وائرس کے چھ نئے کیسز کی تصدیق ہونے کے بعد متأثرہ علاقوں کو مکمل طور سے بند کردیا گیا ہے۔
عوام کو مسلسل ہدایت کی جارہی ہے کہ وہ اپنے گھروں میں ہی رہ کر تمام کام انجام دیں اور بلا ضرورت باہر نہ نکلیں۔
ضلع مجسٹریٹ چندر بوش نے بتایا کہ ہمارے یہاں پہلے سے کورونا کے 8 کیسز تھے لیکن آج چھ نئے کیسز کے آنے کے سبب کورونا وائرس سے متأثر افراد کی مجموعی تعداد 14 ہوگئی ہے، اور اس میں سے ایک شخص کی موت ہوگئی جبکہ ایک شخص صحت یاب بھی ہوچکا ہے۔
متأثرہ افراد کا جس بھی علاقے سے تعلق ہے ان تمام علاقوں کو بند کر دیا گیا ہے، سب سے زیادہ کیسز جس علاقے میں پائے جارہے ہیں ان کو ہاٹ اسپاٹ بنا دیا گیا ہے جہاں پر طبی عملے کی ٹیمیں مسلسل رینڈم سیمپل جمع کررہے ہیں۔
انھوں نے کہا کہ ہمارے یہاں صرف ایک تبلیغی جماعت کا شخص تھا اس میں کورونا کی رپورٹ منفی آئی تھی اور یہاں پر میڈیکل کالج کے انفیکشن سے کیسز آرہے ہیں۔ جس علاقے میں کیس آرہے ہیں ہماری نگاہیں ان علاقوں پر ہیں اور اس علاقوں میں کوئی بھی دکان نہیں کھولی جارہی ہے۔
