اتر پردیش کے ضلع علی گڑھ میں کورونا سے متاثرین افراد کی تعداد میں مسلسل اضافہ درج کیا جا رہا ہے، جس سے لوگوں میں خوف و ہراس کا ماحول ہے۔ گزشتہ شب میں مزید 120 کورونا مثبت رپورٹ سامنے آئی ہے۔ یہ رپورٹ اے ایم یو کے جواہر لعل نہرو میڈیکل کالج، سرکاری اور پرائیویٹ لیب سے آئی ہے۔
لوگوں نے احتیاطی تدابیر چھوڑ دی ہے جس کے سبب کورونا وائرس میں مسلسل اضافہ ہو رہا ہے۔ اَن لاک کی وجہ سے بازاروں میں خاصی بھیڑ دیکھی جا رہی ہے اور سماجی فاصلے کا بھی خیال نہیں رکھا جا رہا ہے۔
علی گڑھ ڈی ایم چندر بھوشن سنگھ نے ایک بار پھر عوام سے اپیل کی ہے کہ وہ اپنے گھروں میں محفوظ رہیں اور ضرورت پر ہی گھر سے باہر نکلیں۔
علی گڑھ میں آج صبح 10 بجے تک کورونا وائرس متاثرین کی تعداد 2826 پہنچ گئی ہے جس میں 31 اموات ہو چکی ہیں۔
اس کے علاوہ ضلع میں 1985 مریض صحتیاب ہو کر اپنے گھر لوٹ چکے ہیں جبکہ 800 ایکٹیو کیسز ہیں۔
