غریب نواز خدمت فاؤنڈیشن اور بے بی این جی او نے ڈائریکٹوریٹ آف آیوروید ڈپارٹمنٹ کی جانب سے اجمیر کے درگاہ علاقہ گنج سے یونانی ہاسپٹل خالی کرنے کے حکم پر اعتراض کیا ہے۔ اس کے ساتھ ہی اگر آیوروید ڈپارٹمنٹ کی جانب سے جلد ہی احکامات واپس نہیں لیے گئے تو احتجاج کا بھی انتباہ دیا ہے۔ Unani Medicine Hospitals in Ajmer
اب جبکہ عوام کورونا وبائی مرض کی تیسری لہر سے خوفزدہ ہیں تو ڈائریکٹوریٹ آف آیوروید نے یکم فروری تک یونانی دواخانہ کو خالی کرنے کے احکامات جاری کیے ہیں۔
مرکز کی نریندر مودی حکومت نے حال ہی میں محکمۂ آیوش کی جانب سے اس اسپتال پر 42 لاکھ روپے کے ترقیاتی کام کیے گئے ہیں۔ آنے والی اسکیم کے تحت مریضوں کو بھی ہاسپٹل میں داخل بھی کیا جائے گا۔ لیکن ریاست کی گہلوت حکومت یکم فروری تک اس اسپتال کو خالی کروانا چاہتی ہے۔ اس حکم کے خلاف غریب نواز خدمت فاؤنڈیشن نے خبردار کیا ہے کہ اگر ریاستی حکومت نے اپنے احکام کو جلد واپس نہ لیا تو احتجاج کیا جائے گا۔
یہ امر قابل ذکر ہے کہ اس اسپتال کے خالی ہونے سے ایک طرف بزرگ اور بیمار مریضوں کو شدید پریشانی کا سامنا کرنا پڑے گا تو دوسری طرف 42 لاکھ کے ترقیاتی کام بھی ضائع ہو جائیں گے۔
