سلطان الہند حضرت خواجہ غریب نواز کے 809 عرس کے موقعے پر کانگریس صدر سونیا گاندھی کی جانب سے چادر پیش کی گئی۔ خواجہ صاحب کے آستانے پر یہ چادر راجستھان کے وزیر اعلی اشوک گہلوت اپنے قافلے کے ساتھ لے کر پہنچے۔ وزیر اعلی کی آمد کے پیش نظر درگاہ میں پولیس کے سخت انتظامات کیے گئے تھے اور درگاہ میں زائرین کے داخل ہونے پر پابندی کے درمیان وزیر اعلی نے چادر پیش کی۔
مزید پڑھیں: ''حاضری نہیں دینے والوں کی بھی دعائیں پوری ہوتی ہیں''
خاص بات یہ رہی کی ہر مرتبہ خواجہ کے عرس میں گاندھی خاندان کی چادر میں سب سے آگے دکھائی دینے والے راجستھان کانگریس کے سابق صدر سچین پائلٹ کہیں نظر نہیں آئے، جب کی ہر بار کی طرح اس بار بھی کانگریس کے کئی بڑے لیڈر چادر میں موجود رہے۔ سونیا گاندھی کی جانب سے درگاہ میں چادر پوشی کے بعد ان کا ایک پیغام کانگریس اقلیتی قومی صدر ندیم جاوید نے پڑھ کر سنایا'۔
سونیا گاندھی نے اپنے پیغام میں ملک کی سلامتی اور کووڈ۔19 سے خاتمہ کے لیے خصوصی دعا طلب کی، اس موقع پر درگاہ انجمن کی جانب سے سی ایم اشوک گہلوت اور ان کے تمام قافلہ ممبران کو دستار بندی کی گئی۔ وزیر اعلی اشوک گہلوت کو دربار میں زیارت سید غنی گردے جی نے کرائی اور دربار کا تبرک پیش کیا۔
