پیٹرول ڈیزل کی قیمتوں میں اضافے سے عوام پریشان

ایک طرف کورونا وائرس کے قہر اور اقتصادی بحران سے عوام پریشان حال ہے تو دوسری جانب پیٹرول اور ڈیزل کی قیمتوں میں مسلسل اضافہ ہونے کی وجہ سے عام زندگیاں متاثر ہو رہی ہیں۔

اس کے ساتھ ہی آمدروفت کے ذرائع پر اس کا براہ راست اثر پڑ رہا ہے تو ضروری اشیاء کی قیمتوں میں بھی اضافہ ہونا شروع ہو گیا ہے۔

ایسے میں پیٹرول، ڈیزل کی قیمتوں میں اضافہ ہونے پر ای ٹی وی بھارت نے احمدآباد کے عوام کی آرا معلوم کرنے کی کوشش کی۔

مقامی خاتون نورجہاں دیوان نے کہا کہ 'ٹرانسپورٹ پر اس کا سیدھا اثر پڑ رہا ہے تو لوگوں کے کھانے کی تھالی کا ذائقہ بھی بگڑ گیا ہے کیونکہ پیٹرول ڈیزل کے دام بڑھنے سے مہنگائی بڑھتی جا رہی ہے اور ہر ضروری چیز کی قیمتوں میں بھی اضافہ ہوتا جا رہا ہے۔'

مقامی شخص آصف خان جولی نے کہا کہ 'منموہن سنگھ کی سرکار میں کم قیمت میں پیٹرول ڈیزل ہونے کے باوجود ہنگامہ برپا رہتا تھا لیکن آج تاریخ میں پہلی بار اتنی زیادہ قیمت میں پیٹرول ڈیزل مہیا ہو رہا ہے۔ اس پر بی جے پی حکومت خاموش ہے۔'