ایسے میں جماعت اسلامی ہند گجرات کی سکریٹری عارفہ پروین نے ماہ رمضان کے تعلق سے خواتین سے اپیل کرتے ہوئے کہا ہے کہ ایسے حالات میں ہم خواتین کی بھی ذمہ داری بنتی ہے کہ اس لاک ڈاؤن پر عمل کریں اور گھر والوں کو اس کی تاکید کریں۔ ضرورت کے بغیر نہ ہی گھر سے باہر نکلیں اور نہ ہی کسی کو گھر سے باہر جانے دیں۔ جب باہر نکلیں تو پوری حفاظتی تدابیر کے ساتھ باہر نکلیں اور سماجی دوریاں بنائے رکھیں۔ گھر کا ماحول خوبصورت بنائے رکھیں اور اس آزمائش کی وقت میں پورا پورا ساتھ دیں۔
انہوں نے مزید کہا کہ بچوں کو آئندہ برس کے کورس کے تعلق سے پڑھانا شروع کریں۔ بچوں کو کھیل کود میں مصروف رکھیں۔ انڈور گیمز کھلائیں اور سوال جواب کے کچھ کھیل سکھائیں۔ ان کا دل بہلائیں۔ ان کی کچھ خاص کوالٹی کو دیکھ کر اسے پروان چڑھانے کی کوشش کریں۔ اس دوران گھر میں ٹائم ٹیبل بنائیں اور گھر کا ماحول خوشگوار بنائیں۔
شوشل میڈیا اور ٹیکنالوجی کے ذریعہ سے ہم اپنے اپنے اہل و عیال پڑوسیوں اور رشتہ داروں کی خیر خیریت پوچھتے رہیں، ان کی مدد کے لیے پیش پیش رہیں۔
سبھی کو رمضان المبارک کی مبارک باد پیش کرنے کے بعد انہوں نے کہا کہ اس برس یہ مہینہ کچھ خاص طریقے سے منایا جانے والا ہے۔ اس لیے اپنے گھروں میں عبادت، نماز تراویح کا احتمام کریں۔
تاہم اس وائرس سے اپنے آپ اور دوسروں کو بھی بچانے کی کوشش کریں کیونکہ آج کورونا وائرس سے بچنے کے لیے سماجی دوری بنائے رکھنا ضروری ہے۔ سحری اور افطار میں جو حاصل ہو اس پر صبر سے کام لیں۔ جو کچھ بھی حاصل ہو اس سے استفادہ کریں۔ خواتین بھی اعتکاف کر سکتی ہیں اور زیادہ سے زیادہ اس دوران خواتین اعتکاف پر بیٹھیں اور اپنے لیے اپنے گھر والوں اور ساری انسانیت کے لیے دعائیں کریں۔
