گجرات فساد کے 18 برس مکمل ہونے پر احمدآباد کے مرارجی چوک میں سی اے اے اور این آر سی کے خلاف جاری احتجاج میں خواتین نے سنہ 2002 کے فرقہ وارانہ فساد اور دہلی فساد میں ہلاک ہونے والوں کو کینڈل روشن کرکے خراج تحسین پیش کیا۔
خواتین مظاہرین نے کہا کہ ’آج بھی جب ہمیں گجرات فساد کے بارے میں بتایا جاتا ہے تو روح کانپ جاتی ہے اور اب 2020 میں ہم نے دہلی فساد کو دیکھا ہے جس میں ہلاکتوں کی تعداد بڑھتی ہی جارہی ہے، اس لیے ہم تمام ہلاک شدگان کو خراج عقیدت پیش کرتے ہیں.
خواتین نے کہا کہ سنہ 2002 جیسی ہی صورت دہلی کی بھی ہے جس میں پولیس کچھ بھی کنٹرول کرنے سے قاصر نظر آرہی تھی۔
مظاہرین نے مزید کہا کہ ’اگر 2002 فساد متاثرین کو انصاف مل گیا ہوتا تو دوبارہ فساد جیسے حالات نہیں پیدا ہوتے۔
واضح رہے کہ گزشتہ 31 دنوں سے احمدآباد کے مورارجی چوک پر خواتین سی اے اے، این آر سی اور این پی آر کے خلاف احتجاج کررہی ہیں اور سی اے اے اے کو واپس لینے کا مطالبہ کر رہی ہیں۔
