حیدرآباد: تلنگانہ کے وزیر انفارمیشن ٹکنالوجی کے تارک راما راو کا داوس ٹاون میں دورہ جاری ہے۔ اپولو ٹائرز لمیٹڈ نے اعلان کیا ہے کہ وہ تلنگانہ حکومت کے ساتھ شراکت کرتے ہوئے حیدرآباد میں ایک ڈیجیٹل انوویشن سنٹر کھولے گا۔
کمپنی نے کہا کہ وہ لندن کے بعد حیدرآباد میں اپنا دوسرا ڈیجیٹل انوویشن سنٹر قائم کر رہی ہے۔ تلنگانہ حکومت کی جانب سے چیف سکریٹری محکمہ صنعت جییش رنجن، اپولو ٹائرس لمیٹڈ کے وی سی اور ایم ڈی نیرج کنور نے داوس میں ورلڈ اکنامک فورم کانفرنس کے دوران وزیر تارک راما راو کی موجودگی میں اس خصوص میں ایک معاہدہ پر دستخط کئے۔چوتھے صنعتی انقلاب کے حصے کے طور پر، کمپنی کی ڈیجیٹل حکمت عملی میں آئی اوٹی، کلاؤڈ کمپیوٹنگ، مصنوعی ذہانت، مشین لرننگ، روبوٹک پروسیس آٹومیشن، اور بلاک چین جیسی جدید ٹکنالوجیز شامل ہیں۔ کمپنی نے اعلان کیا کہ وہ نئے کاروباری ماڈل استعمال اور تیار کرے گی۔
اس نے کہا کہ یہ ڈیجیٹل انوویشن سینٹر صارفین کو زیادہ سے زیادہ بہتر سہولیات فراہم کرنے میں اہم کردار ادا کرے گا۔ یہ سنٹر مارکٹنگ اور مینوفیکچرنگ کی صلاحیتوں کو بڑھانے کے ساتھ ساتھ کمپنی کی سپلائی چین کو زیادہ مؤثر طریقہ سے استعمال کرتے ہوئے منصوبہ بند اہداف کے حصول میں اہم کردار ادا کرے گا۔ اپالو ٹائرز نے نشاندہی کرتے ہوئے کہا کہ اپنے مستقبل کے منصوبوں کو حاصل کرنے کے لیے ڈیجیٹلائزیشن ضروری ہے۔لندن کے بعد حیدرآباد میں ڈیجیٹل انوویشن سنٹر کا قیام کمپنی کی ڈیجیٹل حکمت عملی کا حصہ ہے۔
نیرج کنور، وی سی، ایم ڈی، اپولو ٹائرس لمیٹڈ نے تعاون کے لیے تلنگانہ حکومت کا شکریہ ادا کیا۔تلنگانہ میں ایک گیگا واٹ لیتھیم کیتھوڈ میٹریل مینوفیکچرنگ سنٹر دوبارہ قائم کیاجائے گا۔ الیکس ایڈوانس میٹریلز پرائیویٹ لمیٹڈ، بیٹریاں بنانے والی بین الاقوامی شہرت یافتہ کمپنی ہے جس نے ابتدا میں دس کروڑ روپے کی سرمایہ کاری کا اعلان کیا ہے۔داوس میں وزیرتارک راما راو کی موجودگی میں ایلارڈس کمپنی کے نمائندوں نے اس حد تک حکومت تلنگانہ کے ساتھ مفاہمت کی یادداشت پر دستخط کیے۔
یو این آئی
