ریزرو بینک آف انڈیا (آر بی آئی) کی جانب سے جمعہ کے روز جاری اعداد و شمار کے مطابق 16 اکتوبرکو ختم ہفتے میں ملک کے زر مبادلہ کا ذخیرہ 3.61 ارب ڈالر بڑھ کر 555.12 ارب ڈالر کا ہو گیا۔ یہ مسلسل تیسرا ہفتہ ہے جب اس میں اضافہ ہوا ہے۔ اس سے پہلے نو اکتوبر کو ختم ہفتے میں 5.87 ارب ڈالر بڑھ کر 551.51 ارب ڈالر پر اور 02 اکتوبر کو ختم ہفتے میں یہ 3.62 ارب ڈالر بڑھ کر 545.64 ارب ڈالر پر تھا۔
ریزرو بینک آف انڈیا نے آج بتایا کہ 16 اکتوبر کو ختم ہفتے میں زر مبادلہ کے ذخیرے کا سب سے بڑا جزو غیر ملکی کرنسی کا اثاثہ 3.54 ارب ڈالر کے اضافے کے ساتھ 512.32 ارب ڈالر پر پہنچ گیا۔ سونے کا ذخیرہ بھی 8.6 کروڑ ڈالر بڑھ کر 36.68 ارب ڈالر کا ہو گیا۔
بین الاقوامی مالیاتی فنڈ (آئی ایم ایف) کے پاس غیر ریزرو فنڈ 1.1 کروڑ ڈالر کم ہو کر 4.63 ارب ڈالر اور اسپیشل ڈرائنگ رائٹ 1.48 ارب ڈالر پر مستحکم رہا۔
