کولکاتا: مغربی بنگال حکومت نے 1.6کروڑ خاندان کی خواتین سربراہ کو اگلے مہینے جولائی سے مالی مدد کرنے کا فیصلہ کیا ہے۔
حکومت کے ذرائع کے مطابق حکومت نے اس کےلئے مستحق افراد کا ڈاٹا بیس تیار کیا ہے۔ اس کے بعد 'لکشمی بھنڈار' اسکیم کے تحت شیڈول کاسٹ و شیڈول ٹرائب کی خواتین کو ماہانہ 1000 روپے اور جنرل طبقے کی خواتین کو ماہانہ 500 روپے دیے جائیں گے۔ حکومت کے اندازے کے مطابق 1.6کروڑ خاندان کی خواتین کو فائدہ ملے گا۔
ریاستی حکومت کو اس اسکیم ک کے تحت سالانہ 11,000 کروڑ روپے خرچ کرنے ہوں گے۔ ترنمو ل کانگریس کے انتخابی منشور کا یہ حصہ تھا تاہم، اس وعدے کو عملی جامہ پہنانے کے لئے ریاست کے محکمہ خزانہ کو دوسرے محکموں کے لیے مختص رقم کم کرنی پڑسکتی ہے۔ محکمہ خزانہ کے ایک اور عہدیدار نے بتایا کہ ہمیں دوسرے ذرائع سے بھی فنڈز کا بندوبست کرنا ہے اور ہم نے یہ کرنا شروع کردیا ہے۔ انہوں نے کہا کہ خواتین کو اسکیم سے فائدہ اٹھانے کے لیےکچھ شرطین نافذ کئے گئے ہیں۔ جس میں خاندان کی آمدنی کی تفصیل بھی شامل ہے۔
یواین آئی
