ای شرم پورٹل پر ایک کروڑ سے زیادہ افراد نے اپنا اندراج کرایا

غیرمنظم شعبے میں کام کرنے والے مزدوروں کے رجسٹریشن میں تیزی درج کی گئی ہے، اب تک ایک کروڑ سے زیادہ افراد نے، ای۔شرم پورٹل پر رجسٹریشن کرایا ہے۔

مرکز کی مودی حکومت نے غیر منظم شعبوں میں کام کرنے والے ملک کے کروڑوں مزدوروں کا اعداد و شمار مرتب کرنے کے لیے 26 اگست کو ای پورٹل کا آغاز کیا تھا۔ پورٹل کے آغاز کے بعد سے ہی مزدوروں نے اندراج کرنا شروع کردیا ہے۔

وزارت محنت کے مطابق اب تک ایک کروڑ سے زائد مزدوروں نے ای شرام پورٹل پر اپنا اندراج کرایا ہے۔ مجموعی طور پر ایک کروڑ تین لاکھ بارہ ہزار سے زیادہ کارکنوں نے مذکورہ پورٹل پر اپنا رجسٹریشن کرایا ہے۔ ان میں سے لگ بھگ 43 فیصد خواتین ہیں۔

تازہ اعداد وشمار کے مطابق اس کام میں بہار، اڈیشہ، اترپردیش اور مغربی بنگال پیش پیش ہیں جہاں سب سے زیادہ لوگوں نے اپنا اندراج کرایا ہے۔

واضح رہے کہ ملک میں غیر منظم سیکٹر میں کام کرنے والے سبھی ورکروں کا اعداد و شمار مرتب کرنے کے لیے مرکزی حکومت نے اگست میں ای-شرم پورٹل کا آغاز کیا تھا۔ 2019-20 کے اقتصادی جائزے کے مطابق ملک میں تقریباً 38 کروڑ غیر منظم مزدور ہیں۔ اِن میں سے ایک کروڑ سے زیادہ کارکن پورٹل میں پہلے ہی اپنا اندراج کرا چکے ہیں۔