سینئر کانگریسی رہنما اور سابق وزیر خزانہ پی چدمبرم نے بدھ کے روز کہا کہ' حکومت کی تین بڑی غلطیوں، نوٹ بندی، عجلب میں لائی جانے والی جی ایس ٹی اور بینکنگ کے شعبے پر دباؤ کی وجہ سے معیشت قابو سے باہر ہو چکی ہے اور یہی وجہ ہے کہ آج بھارتی معیشت میں مندی ہے'۔
بدھ کے روز شری رام کالج آف کامرس کے طلباء سے خطاب کرتے ہوئے چدمبرم نے کہا کہ' حکومت نے تین بڑی غلطیاں کیں۔ ان میں نوٹ بندی ایک تاریخی غلطی، عجلت میں لائی جانے والی اشیاء و خدمات ٹیکس (جی ایس ٹی) اور بینکاری کے شعبے پر دباؤ جیسی غلطیوں کی وجہ سے آج ہماری معیشت ٹوٹ رہی ہے'۔
چدمبرم نے کہا کہ' ہم لڑکھڑاتے ہوئے آگے بڑھ رہے ہیں، اگر مغربی ایشیاء میں کوئی مسئلہ پیدا ہوتا یا امریکہ اور چین کے مابین تجارتی جنگ شروع ہوتا ہے تو کیا ہمارے پاس کوئی متبادل راستہ موجود ہے، یعنی کوئی پلان بی ہے؟'۔
انہوں نے کہا کہ حکومت نے مارکیٹ نمو کی شرح کا 10 فیصد ہدف مقرر کیا ہے یہ 'مایوس کن' ہے۔ اصل نمو کی شرح حد سے پانچ فیصد ہوگی'۔
چدمبرم نے کہا 'شرح نمو گذشتہ چھ سہ ماہی میں گھٹی ہے۔ اگر ساتویں سہ ماہی میں بھی ایسا ہوتا ہے تو اس کا مطلب یہ ہوگا کہ یہ زوال جاری رہے گا۔ ہم ابھی بھی ایک سرنگ میں ہیں جہاں روشنی نہیں ہے۔ ہم خود ہی سرنگ میں ہی ہیں'۔
سابق وزیر خزانہ نے کہا کہ اپوزیشن معیشت میں مندی کی وجہ بتا رہی ہے، جبکہ اس کی وضاحت حکومت کو دینی چاہیے۔ متعدد معاشی اعداد و شمار دیتے ہوئے، چدم برم نے کہا کہ یہ ایک خراب معیشت کی نشاندہی کرتی ہے'۔
انہوں نے کہا کہ کان کنی، مینوفیکچرنگ، بجلی، کوئلہ، خام تیل اور گیس کے تمام شعبوں کی کارکردگی انتہائی خراب ہے۔ انہوں نے کہا کہ حکومت نے ڈمانڈ کو بہتر بنانے کے لیے کارپوریٹ ٹیکس میں کمی کی ہے۔ کارپوریٹ ٹیکس کو کم کرنے کے بجائے اگر حکومت جی ایس ٹی میں ریلیف دیتی تو لاکھوں افراد کے ہاتھوں میں زیادہ رقم ہوتی، جس سے سرمایہ کاری میں اضافہ ہوتا'۔
انہوں نے کہا کہ لوگوں کے ہاتھوں میں زیادہ سے زیادہ رقم لانے کا دوسرا آپشن منیریگا اور پردھان منتری کسان یوجنا میں زیادہ رقم ڈالنا ہوسکتا ہے۔ لیکن بدقسمتی سے حکومت نے آئندہ مالی برس کے بجٹ میں ایسی اسکیموں کے بجٹ میں کمی کردی ہے۔'
چدم برم نے کہا کہ' حکومت نے معیشت فروغ دینے کا ایک بہت بڑا موقع گنوا دیا ہے'۔
