Bird Farming: برڈ فارمنگ شوق بھی اور پیشہ بھی؟

ایک زمانے تک لوگ اپنے شوق کی تسکین کے لیے گھروں میں مختلف اقسام کے پرندے پالتے تھے۔ مگر وقت گزرنے کے ساتھ ساتھ یہ شوق اب ایک تجارت کی شکل اختیار کرچکا ہے۔ اس روزگار سے وابستہ افراد نے اپنے گھروں کی چھتوں پر پنجرے بنا رکھے ہیں۔ جہاں مختلف اقسام کے پرندوں کی 'برڈ فارمنگ کی جاتی ہے' اور ان پرندوں کو بازار میں فروخت بھی کیا جاتا ہے۔

مسلم اکثریتی شہر کی شناخت رکھنے والا شہر مالیگاؤں کو ہر اعتبار سے منفرد مقام حاصل ہے۔ یہاں کے جمعہ اور خصوصی بازار قابل ذکر ہیں۔ جو رونق یہاں کے بازاروں میں نظر آتی ہے اس کی مثال شاید ہی ملک کے کسی دوسرے شہروں میں دیکھنے کو ملتی ہوگی۔ اس تناظر میں مہاراشٹر کی سب سے بڑی پرندوں کی ہفتہ وار مارکیٹ کہی جانے والی مالیگاؤں موسم ندی کے کنارے پر واقع سردار مارکیٹ ہے۔ اس مارکیٹ میں مختلف اقسام کے پرندوں کی خرید و فروخت کی جاتی ہے۔ اس بازار میں کبوتر مرغی، آسٹریلین طوطوں جیسے عام پرندوں کے علاوہ اعلیٰ اور نایاب نسل کے قیمتی پرندے بھی مل جاتے ہیں۔ پرندوں کا یہ بازار گزشتہ کئی دہائیوں سے لگایا جارہا ہے۔

اس تعلق سے برڈ فارمنگ شعبے سے وابستہ ذاکر حسین نے نمائندے ای ٹی وی بھارت کو بتایا کہ وہ اس کاروبار سے گزشتہ 12 برسوں سے منسلک ہیں۔ انہوں نے کہاکہ شہر کے ہزاروں افراد اس کاروبار سے وابستہ ہیں جو دن میں چند گھنٹے پرندوں کی دیکھ بھال سے معقول اضافی آمدنی کما رہے ہیں۔ اس کے علاوہ برڈ فارمنگ دو طریقوں سے کی جاتی ہے ایک تو دیسی طریقہ اور دوسرا پیشہ ورانہ طریقہ۔ عام طور پر شہر میں پیشہ ورانہ طور پر اس کام کو انجام دینے والے افراد کی تعداد بہت کم دیکھنے کو ملتی ہے۔ جب کہ دیسی طریقوں سے فارمنگ کرنے والے افراد کی آمدنی کچھ خاص نہیں ہوتی ہے۔ ایک سوال کے جواب میں ذاکر حسین نے بتایا کہ حکومت نے پرواز نامی ایک ویب سائٹ جاری کی ہے۔ جس پر پرندوں کے تعلق سے تمام گائیڈ اور معلومات دستیاب ہیں۔ اور اس ویب سائٹ پر حکومت نے جن پرندوں کی فارمنگ کی اجازت دی ہے ان تمام پرندوں کے ناموں کی فہرست بھی موجود ہے۔ پیشہ ورانہ طور پر اس کاروبار سے منسلک افراد کے لیے یہ ویب سائٹ کافی کارآمد ہے۔ دوران گفتگو ذاکر حسین نے بتایا کہ مالیگاؤں میں گزشتہ کئی برسوں سے پرندوں کی ہفتہ وار مارکیٹ لگائی جاتی ہے۔

یہ ہفتہ وار بازار کاروباری افراد کے کاروبار کو فروغ دینے میں اہم کردار ادا کرتا ہے۔ یہاں عارضی دکانوں کے علاوہ مچھلی اور ایکویریم کی دکانیں، پرندوں کی خوراک، پنجروں اور سامان کی دکانیں مستقل بنیاد پر قائم ہوچکی ہیں اب یہ علاقہ پرندوں اور پالتو جانوروں کے تجارتی مرکز میں تبدیل ہوگیا ہے۔ انہوں نے کہا کہ اس ہفتہ وار پرندہ بازار میں کبوتر مرغی، آسٹریلین طوطوں جیسے عام پرندوں کے علاوہ اعلیٰ اور نایاب نسل کے قیمتی پرندوں کے علاوہ چکور، تیتر، بٹیر اور خرگوش فاختاؤں کی مختلف اقسام کو دیکھا جاسکتا ہے۔ اس ہفتہ واری بازار میں مہاراشٹر کے مختلف اضلاع سے کاروباری افراد پرندوں کی خریداری کے لیے آتے ہیں جس کی وجہ سے یہ بازار ہزاروں شہریوں کو روزگار فراہم کرنے کا سبب بن گیا۔