مغربی بنگال کے گورنر جگدیپ دھنکر اور حکمراں ترنمول کانگریس کے درمیان تلخ بیان بازی کا سلسلہ جاری ہے۔ دو سال قبل 2019 میں جگدیپ دھنکر جب سے گورنر بن کر مغربی بنگال آئے ہیں اس وقت سے اب تک ریاستی حکومت کے ساتھ ان کے تعلقات استوار نہیں ہوئے۔
ترنمول کانگریس کے قومی ترجمان کنال گھوش نے جگدیپ دھنکر پر سخت تنقید کرتے ہوئے انہیں ریاستی بی جے پی کا صدر قرار دیا۔ انہوں نے کہا کہ گورنر جگدیپ دھنکر کو بی جے پی کا ریاستی صدر کہنا کوئی غلط نہیں ہوگا۔ انہوں نے کہا کہ بی جے پی کے ریاستی صدر دلیپ گھوش اور حزب اختلاف کے رہنما شھبندو ادھیکاری سے کہیں زیادہ گورنر جگدیپ دھنکر ریاستی حکومت پر تنقید کرتے ہیں۔ اس سے یہ ثابت ہوتا ہے کہ گورنر کسی ایک مخصوص سیاسی جماعت کے لیے کام کرتے ہیں۔
انہوں نے کہا کہ ’جگدیپ دھنکر، ایسا کرتے ہوئے ریاست میں دفعہ 355 اور 356 کو نافذ کرنے کی راہ ہموار کرنا چاہتے ہیں جبکہ وہ یہ بات بھول جاتے ہیں کہ بنگال کے عوام نے ممتابنرجی کو تیسری مرتبہ حکومت حکومت بنانے کا موقع دیا ہے۔
