سی بی ایس سی نے آج بارہویں جماعت کے نتائج کا اعلان کردیا ہے اس بار بھی حسب معمول لڑکیوں نے ہی سبقت حاصل کی ہے۔
قومی دارالحکومت دہلی میں پرانی دہلی کی جامع مسجد علاقے میں سرکاری سکول کی طالبہ ثنا نیاز نے غیر معمولی کارکردگی کا مظاہرہ کرتے ہوئے 97 فیصد نمبر حاصل کیے۔
واضح رہے کہ جامع مسجد نمبر 2 سکول کی طالبہ ثنا نیاز نے انگلش میں 96 اردو میں 98 تاریخ میں 100 پول سائنس میں 96 ہوم سائنس میں 98 اور سماجی سائنس میں 98 فیصد نمبر حاصل کیے ہیں۔
ای ٹی وی بھارت سے بات چیت کرتے ہوئے ثنا نیاز نے بتایا کیا کہ 'دسویں کے امتحان میں بھی 89 فیصد نمبر حاصل کیے تھے، اس لیے انہیں یقین تھا کہ وہ اس بار بھی اسکول میں پہلا مقام حاصل کریں گی'۔
ثنا نے اپنی کامیابی سے متعلق کہا کہ اگر کسی کو کامیاب ہونا ہے تو اسے کم سے کم آٹھ گھنٹے پڑھائی کرنا ضروری ہے۔
انہوں نے بتایا کہ وہ روزانہ نظام الاوقات بنا کر اپنی تیاری کیا کرتی تھیں، اب وہ مستقبل میں یو پی ایس سی حصہ لینا چاہتی ہیں، اور آئی اے ایس بن کر اپنے والدین کو تحفہ دینا چاہتی ہیں۔
ثنا نے اپنی کامیابی کے پیچھے اپنے والدین اور اپنی بڑی بہن کے ساتھ ساتھ اسکول کے اساتذہ کا اہم کردار بتایا، جبکہ ثنا کی والدہ اسما پروین نے بھی اپنی خواہش ظاہر کرتے ہوئے کہا کہ انہوں نے بہت محنت سے اپنے بچوں کو تعلیم سے آراستہ کیا ہے اس لیے وہ چاہتی ہیں کہ ان کی بیٹی ایک دن آفیسر بن کر ہمارا نام روشن کرے۔
خیال رہے کہ سنہ 2017 میں ثنا کی بڑی بہن عمرہ نیاز نے بھی جامع مسجد نمبر 2 سکول میں 94 فیصد نمبر حاصل کرکے اسکول کا نام روشن کیا۔
